मुंबईत स्वप्नांचं घर असावं असं प्रत्येकाला वाटतं असतं. पण घरांच्या किंमतींनी टोलेजंग इमले केंव्हाच बांधले आहे. त्यामुळेच म्हाडाच्या लाॅटरीतून मुंबईतील हे स्वप्त सत्यात उतरवण्याची संधी आहे, म्हाडाने २२ मे पासून मुंबईतील तब्बल ४०८३ घरांच्या लाॅटरीसाठी सोडत काढली आहे.
येत्या २२ मे पासून या घरांसाठी नोंदणी अर्ज सादर करता येणार आहे. इच्छुक उमेदवाराला आॅनलाईन अर्ज २२ मेपासून म्हाडाच्या https://housing.mhada.gov.in आणि https://www.mhada.gov.in या दोन संकेतस्थळावर खुला करण्यात आला आहे. त्यानंतर १८ जूलैला सकाळी ११ वाजता घरांची सोडत वांद्रे पश्चिम येथील रंगशारदा नाट्यगृहात काढली जाणार आहे. २६ जूनला संध्याकाळी ६ वाजेपर्यंत हे अर्ज स्विकारले जातील. अर्ज करताना अर्जदारांना येणाऱ्या अडचणींसाठी मार्गदर्शनासाठी 022-69468100 या हेल्पलाइन क्रमांकावर संपर्क साधण्याचे आवाहन मुंबई मंडळातर्फे करण्यात आले आहे.
उत्पन्नानुसार वर्गवारी
म्हाडाच्या या मुंबई सोडतीत एकूण ४०८३ सदनिकांसाठी लाॅटरी काढण्यात येणार आहे. उत्पन्नाच्या वर्गवारीनुसार,अत्यल्प गटासाठी २७९० सदनिका, अल्प गटासाठी १०३४ सदनिका, मध्यम गटासाटी १३९ सदनिका आणि उच्च गटासाठी केवळ १२० सदनिकांची सोडत असणार आहे.
अशी आहे आॅनलाईन प्रक्रिया
– ॲण्ड्रोइड मोबाइल फोनवर प्ले स्टोर आणि ॲपल मोबाइल फोनच्या अॅप स्टोरमध्ये सोडत प्रणालीचे मोबाइल ॲप्लिकेशन MHADA HOUSING LOTTERY SYSTEM इच्छुक अर्जदारांकरिता उपलब्ध करून देण्यात आले आहे.
– अर्ज सादर केल्यानंतर उत्पन्न गटानुसार आवश्यक असलेली अनामत रक्कम क्रेडिट कार्ड, डेबिट कार्ड, इंटरनेट बँकिंगद्वारे आॅनलाईन भरण्यासाठी २६ जूनला रात्री ११.५९ वाजेपर्यंत मुदत असणार आहे.
– तर रकमेचा भरणा बँकेत आरटीजीएस, एनईएफटीद्वारे करण्यासाठी २८ जूनला संबंधित बँकेच्या कार्यालयीन वेळेपर्यंत करता येणार आहे.
– सोडतीची प्राप्त अर्जाची प्रारुप यादी ४ जूलैला दुपारी ३ वाजता म्हाडाच्या निर्देशित केलेल्या अधिकृत संकेतस्थळावर प्रसिद्ध केली जाईल.
– प्रारूप यादी प्रसिद्ध झाल्यापासून ऑनलाइन दावे आणि हरकती ७ जुलै दुपारी ३ वाजेपर्यंत दाखल करता येणार आहेत.
– सोडतीसाठी स्वीकृत अर्जांची अंतिम यादी १२ जुलै रोजी दुपारी ३ वाजता म्हाडाच्या अधिकृत संकेतस्थळांवर प्रसिद्ध केली जाणार आहे
उत्पन्न गटानुसार कुठे आहेत घरे
अत्यल्प उत्पन्न गट – सोडतीमधील या गटात पहाडी गोरेगाव पश्चिम येथील प्रधानमंत्री आवास योजनेतील १९४७, अ‍ॅन्टॉप हिल येथे ४१७, विक्रोळीच्या कन्नमवार नगर येथे ४२४ अशा एकूण २७८८ घरांचा समावेश आहे.
अल्प उत्पन्न गट – गोरेगावमधील डोंगराळ भाग, लोकमान्य नगर दादर, अँटॉप हिल वडाळा, गोरेगाव पश्चिम येथीव सिद्धार्थनगर , अंधेरी येथील डीएन नगर, घाटकोपर येथील पंत नगर, विक्रोळी येथील कन्नमवार नगर, चारकोप कांदिवली, कांदिवली येथील महावीर नगर, जुने मागाठाणे बोरिवली, गव्हाणपाडा मुलुंड, पीएमजीपी मानखुर्द, मालाड मालवणी आदी ठिकाणांचा समावेश आहे.
मध्यम उत्पन्न गट – ही घरे उन्नतनगर गोरेगाव पश्चिम, महावीर नगर कांदिवली, जुहू, अंधेरी पश्चिम, अंधेरी पूर्व, सहकार नगर चेंबूर, लोकमान्य नगर दादर, अँटॉप हिल वडाळा, भायखळा, टिळकनगर चेंबूर, चांदिवली पवई, गायकवाड नगर मालाड, प्रतीक्षा नगर सायन, चारकोप कांदिवली येथे आहेत.
उच्च उत्पन्न गट – ही घरे जुहू अंधेरी पश्चिम, वडाळा पश्चिम, ताडदेव, लोअर परळ, शिंपोली कांदिवली, तुंगा पवई, चारकोप कांदिवली, सायन पूर्व येथे आहेत.