शरद पवार यांना ट्विटरच्या माध्यमातून जीवे मारण्याची धमकीच्या घटनेने महाराष्ट्राच्या राजकारणात खळबळ उडवून दिली. शरद पवार यांच्या कन्या,बारामतीच्या खासदार सुप्रिया सुळे यांनी आज सकाळी मुंबईचे पोलीस आयुक्त विवेक फणसळकर यांची भेट घेऊन तक्रार दाखल केली. त्यानंतर सध्या जम्मू काश्मीरच्या दौऱ्यावर असलेले राज्याचे मुख्यमंत्री एकनाथ शिंदे यांनी ट्विटरच्या माध्यमातून या प्रकरणावर सविस्तर प्रतिक्रिया दिली.

मुख्यमंत्री शिंदे म्हणाले, ‘ज्येष्ठ नेते शरद पवार यांना ट्विटरवरुन आलेल्या धमकीची सरकारने गंभीर दखल घेतली असून वरिष्ठ पोलिस अधिकाऱ्यांशी मी स्वतः बोललो आहे. तपासाच्या सूचना दिल्या आहेत. शरद पवार हे ज्येष्ठ नेते असून, त्यांच्याबदल आम्हा सर्वांनाच आदर आहे. त्यांच्या सुरक्षेची संपूर्ण काळजी घेतली जाईल. आवश्यकता असल्यास सुरक्षा व्यवस्थेत वाढही करण्याच्या सूचना पोलिसांना दिल्या आहेत.’

शरद पवारांना धमकी देणारी पिलावळ मनुवादी; भुजबळ संतापले!

राष्ट्रवादी काँग्रेसचे अध्यक्ष शरद पवार व शिवसेनेचे (ठाकरे गट) खासदार संजय राऊत यांना जीवे मारण्याच्या धमक्या देण्यात आल्या असून त्यामुळं राज्यातील राजकीय वातावरण तापलं आहे. राष्ट्रवादी काँग्रेसचे नेते व माजी मंत्री छगन भुजबळ यांनी राज्यातील या परिस्थितीबाबत चिंता व्यक्त केली आहे. राजकीय नेत्यांना धमकी येणं ही काळजीची बाब आहे. कारण यापूर्वी नरेंद्र दाभोलकर, गोविंद पानसरे, कलबुर्गी आणि गौरी लंकेश यांसारख्या विचारवंत आणि कार्यकर्त्यांचे खून झाले आहेत. त्यामुळं राज्य आणि केंद्र सरकारनं यामागचे ब्रेन कोण आहेत हे शोधून काढावेत, अशी मागणी भुजबळ यांनी केली आहे.