काँग्रेसने वचन पाळले; कर्नाटकात जुलैपासून २०० युनीटपर्यंत मोफत वीज देण्याचा निर्णय

कर्नाटकात सत्ता आल्यास राज्यातील घरगुती वीज ग्राहकांना दोनशे युनीटपर्यंत मोफत वीज देण्याची घोषणा काँग्रेसने आपल्या जाहीरनाम्यातून केली होती. काँग्रेस आता राज्यात सत्तेवर आली आहे, त्यामुळे घरगुती वीज ग्राहकांना २०० युनीटपर्यंत मोफत वीज देणारी गृहज्योती योजना एक जुलैपासून लागू करण्याची घोषणा मुख्यमंत्री सिद्धरामय्या यांनी केली आहे. त्यामुळे वीज ग्राहकांना निश्चित केलेल्या वीजबिलाची रक्कम एक ऑगस्टपासून भरावी लागणार नाही.

मात्र, १ जुलैपर्यंत वापरलेल्या विजेचे (Electricity) कोणतेही शुल्क (बिल) भरणे बाकी नसावे. ही शिल्लक रक्कम भरण्यासाठी तीन महिन्यांचा अतिरिक्त कालावधी लागू केला जाईल आणि पूर्ण शुल्क आकारले जाईल, असे काँग्रेसचे मुख्यमंत्री सिद्धरामय्या यांनी मंत्रिमंडळाच्या बैठकीनंतर स्पष्ट केले.