चिंचवड विधानसभा मतदारसंघातील भाजपच्या उमेदवार अश्विनी जगताप यांना निवडणूक आयोगाने नोटीस बजावली आहे. ‘पेड न्यूज’ प्रकरणी ही नोटीस दिल्याचे निवडणूक विभागाकडून सांगण्यात आले.
एका वेबसाइट आणि साप्ताहिकात आलेल्या बातमीतील मजकूर हा ‘पेड न्यूज’ सदृश्य असल्याचे निदर्शनास आले.पैसे देऊन बातमी प्रकाशित करण्याबाबत भाजप उमेदवार अश्विनी जगताप यांना नोटीस बजावण्यात आली आहे. माध्यम प्रमाणीकरण आणि सह नियंत्रण समितीने याबाबत निवडणूक आयोगाला पत्र पाठवले होते. चिंचवड मतदारसंघामध्ये आचारसंहिता भंगाच्या दहा तक्रारींवर कारवाई करण्यात आली.
अश्विनी जगताप यांना 16 फेब्रुवारीला नोटीस पाठवण्यात आली असून या प्रकरणाचा खुलासा एमसीएमसी समितीकडे पाठवण्यात आला आहे. ही समिती पडताळणी करुन पुढील कारवाई निश्चित करणार आहे. त्यामुळे निवडणूक आयोग काय कारवाई करणार हे महत्त्वाचे ठरणार आहे.
पोटनिवडणुकीचे मतदान कधी?
चिंचवडमध्ये आमदार लक्ष्मण जगताप तर कसब्याच्या आमदार मुक्ता टिळक यांच्या निधनामुळे रिक्त जागेवर पोटनिवडणूक होत आहे. पुण्यातील कसबा पेठ आणि चिंचवड पोटनिवडणुकीसाठी येत्या 26 फेब्रुवारीला मतदान होणार आहे.
प्रचारासाठी काहीच दिवस
प्रचारासाठी काहीच दिवस शिल्लक असल्याने सर्वपक्षीय नेते प्रचारासाठी पुण्यात दाखल झाले आहेत. कसबा आणि चिंचवड निवडणूक भाजप आणि महाविकास आघाडीसाठी प्रतिष्ठेची मानली जात आहे. त्यामुळे दोन्ही पक्षांकडून ताकदीनिशी प्रचार सभा, बाईक रॅली आणि पदयात्रांवर भर दिला जात आहे. या निवडणुकीचा निकाल 2 मार्च रोजी जाहीर करण्यात येणार आहे.
चिंचवड मतदारसंघातून कारवाई
चिंचवड मतदार संघातील पोटनिवडणूक जाहीर झाल्यापासून सुमारे 43 लाख रूपयांची रोकड, चार लाख 97 हजार 625 रुपये किमतीचे मद्य आणि 94 हजार 750 रुपयांचा 3 किलो 584 ग्रॅम गांजा जप्त करण्यात आला असल्याचे निवडणूक विभागाकडून सांगण्यात आले