पुणे : विधानसभा निवडणूक झाल्यानंतर राज्यभरात ठाकरेंच्या शिवसेनेला गळती लागली आहे. पुण्यात देखील पाच माजी नगरसेवकांनी ठाकरेंना अखेरचा जय महाराष्ट्र करत भाजपमध्ये पक्ष प्रवेश केला. विशाल धनवडे, प्राची आल्हाट, बाळा ओसवाल, संगीता ठोसर आणि पल्लवी जावळे या पाचही माजी नगरसेवकांनी मुंबईत भाजपचे प्रदेशाध्यक्ष चंद्रशेखर बावनकुळे यांच्या उपस्थितीत भाजपमध्ये प्रवेश केला.या पाच माजी नगरसेवकांचा प्रवेश होत असताना एकीकडे भाजपमधील अंतर्गत खदखद चव्हाट्यावर आली आहे. तर दुसरीकडे महायुतीचा घटक पक्ष असणाऱ्या शिंदेच्या शिवसेनेने सुद्धा या पाचही नगरसेवकांच्या जागेवर महापालिका निवडणुकीपूर्वीच दावा केला आहे. त्यामुळे या प्रवेशाने पुणे शहरातले राजकीय वातावरण आधीच ढवळून निघालेलं असताना, या नगरसेवकांनी केलेल्या आणखी एका वक्तव्यामुळे महायुतीत वादाची ठिणगी पडण्याची शक्यता आहे.
शिवसेना ही ठाकरेंचीच असल्याचं मत या पाचही नगरसेवकांनी एक सुरात भाजप पक्ष कार्यालयातूनच ठासून सांगितल्यानंतर आता महायुतीमध्ये नवा वाद निर्माण झाला आहे. आज या पाच माजी नगरसेवकांनी पुण्यातील पक्ष कार्यालयात पत्रकार परिषद आयोजित केली होती. भाजपमध्ये प्रवेश केल्यानंतर पहिल्याच पत्रकार परिषदेत या पाच माजी कट्टर शिवसैनिकांनी शिवसेना ही ठाकरेंचीच असल्याचं सांगितलं आणि त्यानंतर नव्या वादाला तोंड फुटल आहे.खरी शिवसेना ही ठाकरेंचीच आहे. पण जे काही राजकारण सुरू आहे ते चालू राहील. आमच्या पक्षप्रवेशाच्या पहिल्याच दिवशी आम्ही सांगितलेल आहे. ज्या पक्षामध्ये आम्ही 25 वर्ष होतो तो पक्ष वाढवण्यासाठी आम्ही जे प्रयत्न केले ते अतिशय प्रामाणिक होते. त्यामुळे त्या पक्षाविषयी आमच्याकडून कोणताही चुकीचा शब्द जाणार नाही. असं विशाल धनवडे म्हणाले आहेत.तर, शिंदे यांनी शिवसेना चोरली हे आत्तापर्यंत तुम्ही बोलत होतात त्यावर तुम्ही ठाम आहात का असा प्रश्न विचारला असता विशाल धनवडे म्हणाले, 100% आम्ही आजही त्यावरच ठाम आहोत. मात्र, न्यायालयात जो काही निकाल लागेल त्याला आम्ही सामोरे जाऊ. त्यामुळे आता नव्याने भाजपात दाखल झालेल्या या नेत्यांच्या वक्तव्यामुळे पुण्यातील महायुतीत मिठाचा खडा पडला हे मात्र नक्की.
