नवी दिल्ली: खासगी क्षेत्रातील देशातील सर्वात मोठी बँक असलेल्या एचडीएफसी बँकेच्या शेअर्समध्ये आज बुधवारी मोठी घसरण झाली. देशातील दुसऱ्या क्रमांकाचे सर्वाधिक मुल्यवान शेअरला मोठा झटका बसला. मुंबई शेअर बाजारात या बँकेच्या शेअर्समध्ये ८.४६ इतकी मोठी घसरण झाली आणि तो १ हजार ५३६.९० रुपयांवर बंद झाला. HDFC बँकेच्या शेअर्समध्ये ३ वर्षातील ही सर्वात मोठी घसरण आहे. या घसरणीमुळे गुंतवणुकदारांना मोठा फटका बसला. बँकेचे मार्केट कॅप ११.६७ कोटी इतके झाले.याआधी HDFC बँकेच्या शेअरमध्ये करोना काळात म्हणजे २३ मार्च २०२० मध्ये १२.७ टक्के इतकी घसरण झाली होती. बँकेने मंगळवारी बाजार बंद झाल्यानंतर डिसेंबर तिमाहीचा निकाल जाहीर केला होता, ज्यावर बाजारातून नकारात्मक प्रतिसाद मिळाला. तिमाही निकालानंतर अनेक ब्रोकरेज कंपन्यांनी टार्गेट प्राइस कमी केला होता.
HDFC बँकेचा नफा तिसऱ्या तिमाहीत गेल्या वर्षाच्या याच काळाच्या तुलनेत ३४ टक्क्यांनी वाढून तो १६ हजार ३७३ कोटी झाला. बँकेचा एनआयएम ३.७ टक्के इतका राहिला. पण गेल्या तिमाहीच्या तुलनेत तो फ्लॅट आहे. या निकालानंतर बँकेच्या शेअरचा टार्गेट प्राइस २ हजार १०० वरून २ हजार रुपये इतका करण्यात आला. गेल्या दोन वर्षात बँकेच्या शेअरमध्ये फक्त १ टक्के तेजी आली आहे. या काळात सेन्सेक्समध्ये १७ वेळा तो तेजीत होता. HDFC बँकेने गेल्या वर्षी एचडीएफसी लिमिटेडसह रिव्हर्स मर्जर केले होते.
मंगळवारी बाजार बंद झाल्यानंतर बँकेने तिमाही निकाल जाहीर केले होते. बँकेचा निवळ नफा गेल्या वर्षाच्या डिसेंबरच्या तिमाहीच्या तुलनेत ३४ टक्के तेजीसह १६ हजार ३७२.५४ कोटी इतका झालाय. बँकेचा नेट इंटरेस्ट २४ टक्के तेजीसह २८ हजार ४७१.३४ कोटी इतका आहे. गेल्या तिमाहीशी तुलना केल्यास बँकेचा नफा २.५ टक्के आणि नेट इंटरेस्ट इनकम ४ टक्के इतका वाढला आहे. मुकेश अंबानींची रिलायन्स आणि टाटा ग्रुपमधील टीसीएस कंपनीनंतर एचडीएफसी बँक देशातील तिसरी मोठी मुल्यवान कंपनी आहे.