अखेर लातूरच्या पीटलाइनचा मार्ग मोकळा, २७ कोटींचा निधी मंजूर!

लातूर : लातूरला ब्रॉडगेज होऊन १६ वर्ष होऊन गेले आहेत. त्यावेळेपासून येथे पीटलाइन करावी अशी मागणी होती. पण रेल्वेकडून सातत्याने या मागणीकडे दुर्लक्ष केले जात होते. मात्र शुक्रवारी (ता. पाच) रेल्वेने लातूरसाठी पीटलाइन मंजूर केली आहे. या कामाकरिता २७ कोटी ७० लाखाचा निधी मंजूर केला आहे. पीटलाइन होणार असल्याने आता लांब पल्ल्याच्या रेल्वे येथे येण्याचा मार्ग मोकळा होणार आहे.लातूर येथे १९२३ मध्ये नॅरोगेज रेल्वे सुरु झाली होती. त्यानंतर २००७ मध्ये या नॅरोगेज रेल्वेचे ब्रॉडगेजमध्ये रूपांतर झाले. २००८ मध्ये लातूर-मिरज ही रेल्वेलाईन नॅरोगेजवरून ब्रॉडगेजवर गेली. याकरिता तत्कालीन मुख्यमंत्री विलासराव देशमुख यांनी रोजगार हमी योजनेतून खडीचा पुरवठा केल्यानेही हे काम होऊ शकले होते. देशात अशा पद्धतीचा पहिलाच प्रयोग होता. त्यानंतर लातूर-मुंबई ही पहिली एक्सप्रेस त्यांच्यामुळे येथे सुरू होऊ शकली. त्यानंतर हळूहळू या मार्गावर काही रेल्वे सुरु झाल्या.