पश्चिम महाराष्ट्र, विदर्भ, उत्तर महाराष्ट्र आणि मराठवाड्यात सर्वदूर बरसलेल्या दमदार सरींमुळे नदी, नाल्यांना पूर आला आहे. या पुरामुळे अनेक मार्ग बंद पडल्याने अनेक गावांचा संपर्क तुटला आहे. अतिवृष्टीच्या पार्श्वभूमीवर राज्य सरकारने जिल्हाधिकाऱ्यांना शाळांना सुटी जाहीर करण्याचे केले आहे.
मुंबईसह ठाणे, कल्याण, अंबरनाथ, बदलापूर आणि उल्हासनगर परिसरात बुधवार पहाटेपासून कोसळणाऱ्या मुसळधार पावसामुळे व नद्यांना पूर आल्याने या शहरांचा बहुतांश भाग पाण्याखाली गेला होता. घाटमाथ्यावर मुसळधार, तर पुणे जिल्ह्याच्या बहुतांश भागात जोरदार पाऊस झाला. मावळ, मुळशी, वेल्हे, मंचर, जुन्नर, भीमाशंकर भागात जोराचा पाऊस पडला. त्यामुळे पेरणीच्या लगबगीत असलेले शेतकरी आनंदी झाले. सांगली आणि परिसरात गेल्या दोन दिवसांपासून संततधार पावसाला सुरुवात झाली आहे. शिराळा तालुका वगळता इतर ठिकाणी पावसाला जोर नाही; परंतु पावसाळ्यात अतिवृष्टीमुळे होणारे संभाव्य नुकसान टाळण्यासाठी व मदतकार्य राबविण्यासाठी एनडीआरएफचे पथक सांगली जिल्ह्यात दाखल झाले आहे. २०१९ आणि २०२१मध्ये जुलै महिन्यात शेवटी पडलेला पाऊस व हवामान खात्याकडील अंदाज पाहता त्यानुसार राज्य सरकारकडून खबरदारी घेण्यात येत आहे. हे पथक ३१ ऑगस्टपर्यंत जिल्ह्यात कार्यरत राहणार आहे. सातारा जिल्ह्याच्या पश्चिम भागात जोरदार पाऊस पडत असल्याने महाबळेश्वरमधून पोलादपूरला जाणाऱ्या आंबेनळी आणि कोयनानगरपासून चिपळूणला जाणाऱ्या कुंभार्ली घाटात बुधवारी दरड कोसळली. यामुळे वाहतूक ठप्प झाली आहे.
नांदेडमध्ये दोन मुले बुडाली
नांदेड : शहरालगत असलेल्या आसना नदीत दोन मुलांचा बुडून मृत्यू झाला. ही घटना बुधवारी सायंकाळी उघडकीस आली. कामठा येथील साईनाथ चुनुरकर (नय १६) व रमेश आठवले (वय १७) हे दोघे पोहण्यासाठी दुपारी नदीत गेले होते. पाण्याचा अंदाज न आल्याने या दोघांचा बुडून मृत्यू झाला. या घटनेनंतर परिसरातील नागरकिांनी जिल्हाधिकारी कार्यालयाशी संपर्क साधला. आपत्ती व्यवस्थापनातील कर्मचाऱ्यांनी या दोघांचे मृतदेह बाहेर काढले. नांदेड जिल्ह्यातील उमरी तालुक्यात गोरठा येथील एका पुलावर पाणी आल्याने वाहतूक दोन तास बंद होती.
चिपळूणच्या धोक्याबाबत सूचना
मुंबई : कोकणात गेल्या दोन दिवसांपासून सुरू असलेल्या मुसळधार पावसामुळे चिपळूण परिसरातील वाशिष्ठी नदीतील पुराने धोकापातळी गाठली आहे. परिणामी चिपळूण शहरातील सखल भागात पाणी भरण्यास सुरुवात झाली असून, या पार्श्वभूमीवर उपमुख्यमंत्री अजित पवार यांनी रत्नागिरीचे जिल्हाधिकारी एम. देवेंद्र सिंग यांच्याशी दूरध्वनीवरून संवाद साधत पूरस्थितीचा आढावा घेतला व आवश्यक खबरदारी घेण्याच्या स्पष्ट सूचना दिल्या.