पुणे : राष्ट्रवादी काँग्रेसमध्ये बंड केल्यानंतर उपमुख्यमंत्री अजित पवार शिंदे-फडणवीस सरकारमध्ये सहभागी झाले आहेत. पुरेसे संख्याबळ असताना देखील अजित पवार यांच्या गटाला सरकारमध्ये सहभागी करून घेण्याची काय गरज होती, असा सवाल करत शिवसेनेच्या गटातील नेत्यांमध्ये नाराजीचे सूर उमटत होतेच. त्यात अजित पवार यांना अर्थखाते देऊ नये अशी गळ देखील शिवसेनेच्या नेत्यांनी मुख्यमंत्री एकनाथ शिंदेंना घातली होती. मात्र शिवसेना आणि भाजपच्या काही नेत्यांचा विरोध असताना देखील अर्थमंत्री पद खेचून आणण्यात अजित पवारांना यश मिळाले आहे. इतकंच काय तर अर्थ खात्यासोबत कृषी, सहकार, महिला आणि बालविकास, अन्न व नागरी पुरवठा यांसारखे तगडी खाते मिळवत मंत्रिमंडळात अजितदादांची ‘दादागिरी’ दिसून आली आहे
सरकारमधील मित्रपक्षातील नेत्यांच्या प्रखर विरोध असताना देखील अर्थमंत्री हे खात मिळवल्यानंतर आपण हवं ते मिळवतोच अशी पवारांची प्रतिमा पुन्हा अधोरेखित झाली आहे. आता अर्थखातं मिळाल्यानंतर अजित पवारांचा डोळा हा पुण्याच्या पालकमंत्री पदावर आहे. यासाठी राष्ट्रवादीच्या बंडखोर गटाने जोर लावला आहे. राष्ट्रवादी काँग्रेसचे (अजित पवार गट ) जिल्हाध्यक्ष अजित प्रदीप गारटकर यांनी अजित पवारांना पुण्याचे पालकमंत्री करावे अशी मागणी केली आहे. ‘अजित पवार यांना पुणे जिल्ह्यातील सर्व गावांची माहिती आहे. त्यांच्या प्रशासनावर चांगला वचक आहे. यामुळे जिल्ह्यातील विकासकामे वेळेत मार्गी लागण्यास मदत होईल’. असं प्रदीप गारटकर म्हणाले आहेत.तर पुणे शहर राष्ट्रवादी काँग्रेसचे कार्याध्यक्ष प्रदीप देशमुख यांनी देखील अजित पवारच पुण्याचे पालकमंत्री असावेत, असं म्हटले आहे. ‘अजित पवार हे ज्या ज्या वेळेला पुण्याचे पालकमंत्री होते तेव्हा तेव्हा पुण्याच्या प्रश्नाची सोडवणूक झाली आहे. अजित पवारांना पुण्याच्या प्रश्नांची इत्यंभूत माहिती आहे. इतकंच नाही तर पालकमंत्री असताना उर्वरित महाराष्ट्राचा व्याप सोडून आठवड्यातील एक संपूर्ण दिवस अजितदादा हे पुण्यासाठी राखीव ठेवतात. त्यामुळे पुण्याच्या प्रश्नांची जाण असणारा असा नेताच पुण्याचा पालकमंत्री असावा.’ अशी इच्छा देशमुख यांनी व्यक्त केली आहे.सरीकडे पुण्याचे सध्याचे पालकमंत्री हे भाजपचे नेते चंद्रकांत पाटील आहेत. त्यांच्याकडे उच्च आणि तंत्रशिक्षण खाते आहे. राजशिष्टाचाराप्रमाणे हे खाते उपमुख्यमंत्री पदापेक्षा लहान आहे. त्यामुळे पुण्याचा ‘पॉवरफूल’ दादा कोण ? ही लढाई आता सुरु झाली आहे. तिकडे नाशिकमध्ये आपल्यापेक्षा ज्युनिअर असलेल्या पालकमंत्री दादा भुसे यांच्या जिल्हा नियोजन बैठकीला छगन भुजबळ यांनी टाळलं आहे. त्यामुळे पुण्यात चंद्रकांत दादा पालकमंत्री असताना अजित पवार त्यांच्या नेतृत्वाखालील कोणत्याही बैठकीला हजर राहणार का ? असा प्रश्नच आहे.
दरम्यान, पुणे जिल्हा आणि पुणे, पिंपरी – चिंचवड शहर हा अजित पवारांचा बालेकिल्ला राहिलेला आहे. त्यामुळे मंत्रिमंडळात स्थान मिळाल्यानंतर अजित पवार हे पुण्याचे पालकमंत्री होतातच हा अलिखित नियमच आहे. आता शिंदे-फडणवीस यांच्यासमोर मोठा पेच उभा राहिला आहे. त्यामुळे पुण्याचा पालकमंत्री कोण होणार आणि पुण्यात नक्की कोणाची दादागिरी चालणार चंद्रकांतदादा की अजितदादा? याकडे पुणेकरांचा लक्ष लागले आहे.