बारामती- राष्ट्रवादीचे नेते अजित पवार त्यांच्या सहकाऱ्यांसह राज्यातील शिंदे-फडणवीस सरकारमध्ये सहभागी झाले आहेत. त्यांनी उपमुख्यमंत्री पदाची शपथ घेतली आहे. पवारांनी शपथ घेतल्यानंतर बारामतीत थोडी खुशी थोडा गम असे वातावरण निर्माण झाले आहे. अजित पवार उपमुख्यमंत्री झाल्यामुळे युवकांनी फटाके फोडून आनंद व्यक्त केला आहे. तर शरद पवारांच्या विरोधात अजित पवारांनी बंड पुकारल्यामुळे जेष्ठांमध्ये नाराजीचा सूर दिसून येत आहे.बारामती विधानसभा मतदार संघाचे गेली अनेक वर्षांपासून सातत्याने प्रतिनिधित्व करणाऱ्या अजित पवारांच्या बंडामुळे राष्ट्रवादीला धक्का बसला आहे. मात्र बारामतीत अजित पवारांच्या समर्थकांनी फटाके फोडत आनंद व्यक्त केला. बारामतीत पक्षाने यासंबंधी अद्याप अधिकृत भूमिका जाहीर केलेली नाही. तसेच बारामतीत झालेल्या जल्लोषात पक्षाचे प्रमुख पदाधिकारी सहभागी नसल्याचे दिसून आले आहे. पक्षाचे काही माजी नगरसेवक आणि काही कार्यकर्त्यांनी येथील भिगवण चौकात फटाके फोडत एकमेकांना मिठाई वाटत आनंद व्यक्त केला.
राष्ट्रवादी काँग्रेसचे नेते अजित पवार यांनी पुन्हा उपमुख्यमंत्रिपदाची शपथ घेतली आहे. राष्ट्रवादी कॉंग्रेसचा बालेकिल्ला असलेल्या बारामतीत अजित पवारांच्या या भूमिकेमुळे संभ्रम निर्माण झाला आहे. त्यामुळे राष्ट्रवादीचे स्थानिक पदाधिकारी माध्यमांना काहीही बोलण्यास तयार नव्हते. माध्यमांचे प्रतिनिधी शहर आणि तालुका पक्ष कार्यालयाजवळ राष्ट्रवादीच्या पदाधिकाऱ्यांशी बोलण्याचा प्रयत्न करत होते. तेव्हा राष्ट्रवादीचे पदाधिकारी, कार्यकर्ते नो कमेंटस म्हणून बोलत होते.