पुणे:-आम्हाला सावित्री घरोघरी दिसायला लागल्या आहेत. मात्र, चंद्रकांत दादा आणि हेमंत रासने यांच्यासारख्या ज्योतिबांचा शोध मात्र जारी आहे. असे ज्योतिबा समाजात जास्तीत जास्त निर्माण होवोत, असे वक्तव्य भाजप महिला मोर्चाच्या प्रदेशाध्यक्ष चित्रा वाघ यांनी केले आहे. यामुळे आता नवीनच वाद निर्माण झाला आहे. पुण्यातील हळदी-कुंकाच्या कार्यक्रमामध्ये चित्रा वाघ बोलत होत्या.
चित्रा वाघ यांच्या या वक्तव्यावर विरोधक लगेचच तुटून पडले आहेत. राष्ट्रवादी काँग्रेसचे आमदार जितेंद्र आव्हाड आणि अमोल मिटकरी यांनी चित्रा वाघ यांच्यावर आक्रमकपणे टीका केली आहे. इतर विरोधकांकडून चित्रा वाघ यांना लक्ष्य केले जात आहे.
हळदी-कुंकाच्या कार्यक्रमामध्ये चित्रा वाघ यांनी महिलांना मार्गदर्शन केले. यावेळी बोलताना त्या म्हणाल्या, मघाशी चंद्रकांत दादा खूप छान बोलले. आज पहिल्यांदा एका महिलेला पाच पुरूषांनी ओवाळले. म्हणजे दादा नेहमीच काहीतरी वेगळे परिवर्तन घडवतात. हा एक नवीन पायंडा दादांच्या माध्यमातून घातला गेला. पुणे हे स्त्री शक्तीचे केंद्र आहे. पुण्यातूनच सर्व स्त्री शक्तीच्या चळवळींची सुरुवात झालेली आहे.
काय म्हणाल्या वाघ?
चित्रा वाघ पुढे म्हणाल्या, मी नेहमीच म्हणते की आम्हाला सावित्री घरोघरी दिसायला लागल्या आहेत. मात्र चंद्रकांत दादा आणि हेमंत रासने यांच्यासारख्या जोतिबांचा शोध मात्र जारी आहे. असेच जोतिबा समाजात जास्तीत जास्त समाजात निर्माण होवोत, अशा शुभेच्छा देते, सक्षम भारतामध्ये पीएम मोदी यांचे व्हिजन नारी शक्तीला पुढाकार देणारे आहेत. असेही चित्रा वाघ म्हणाल्या.
चित्रा वाघ यांनी चंद्रकांत पाटील आणि महात्मा ज्योतिबा फुले यांच्याबद्दल वक्तव्य केल्यामुळे जितेंद्र आव्हाड यांनी जोरदार हल्लाबोल केला आहे. आपल्या ट्विटमध्ये आव्हाड म्हणाले, ‘यांची डोकी फिरली आहेत, सत्तेचा माज’ असे ट्विट जितेंद्र आव्हाड यांनी केले आहे.
तर अमोल मिटकरी म्हणाले, आम्ही चित्रा वाघ यांना खूप प्रगल्भ समजत होतो, मात्र मानसिक संतुलन ढासळल्यासारखे त्या वागत आहेत. आज त्यांनी कमाल केली. त्यांनी चंद्रकांत पाटील यांची तुलना चक्क महात्मा जोतिराव फुले यांच्यासोबत केली. तुम्ही तुमच्या नेत्यांना खूश करण्यासाठी असे वक्तव्य करत आहात. अशी वक्तव्ये जरूर करावीत, मात्र यामध्ये महापुरुषांना घेऊ नये, अशी टीका अमोल मिटकरी यांनी केली.