05 – औरंगाबाद विभाग शिक्षक मतदारसंघ निवडणूक
पसंती क्रमांकानुसार असे नोंदवा आपले मत
लातूर, (जिमाका) :भारत निवडणूक आयोगाने 29 डिसेंबर रोजी जाहीर केलेल्या निवडणूक कार्यक्रमानुसार औरंगाबाद विभाग शिक्षक मतदारसंघ द्विवार्षिक निवडणुकीसाठी 30 जानेवारी रोजी लातूर जिल्ह्यात 40 मतदान केंद्रांवर मतदान होणार आहे. या निवडणुकीची मतदान प्रक्रिया ही इतर निवडणुकांपेक्षा वेगळी असून या निवडणुकीत मतपत्रिकेवर मतदान होणार आहे. मतदाराला आपले मतदान हे पसंती क्रमांकानुसार करावयाचे असून मतदान करण्यासाठी केवळ मतपत्रिकेसोबत पुरविलेल्या जांभळ्या रंगाच्या स्केचपेनचाच वापर करावा लागणार आहे. याशिवाय इतर पेन, पेन्सिल, बॉलपॉईन्ट पेन यांचा वापर करता येणार नाही.
ज्या उमेदवारास पहिला पसंतीक्रम देण्यासाठी निवडले आहे, त्या उमेदवाराच्या नावासमोरील पसंतीक्रम (Order of Preference) असे नमूद केलेल्या रकान्यात 1 हा अंक नमूद करुन मतदान करावे. निवडून द्यावयाच्या उमेदवारांची संख्या एका पेक्षा जास्त असेल तरी 1 हा अंक केवळ एकाच उमेदवाराच्या नावासमोर नमूद करावा. निवडून द्यावयाच्या उमेदवारांची संख्या कितीही असली तरी तुम्हाला जेवढे उमेदवार निवडणूक लढवित आहेत, तेवढे पसंतीक्रम नोंदविता येतील. उर्वरित उमेदवारांच्या नावासमोर तुमचा पुढील पसंतीक्रम 2, 3, 4 इत्यादी अंक तुमच्या पसंतीक्रमानुसार ‘पसंतीक्रम’ (Order of Preference) या स्तंभामध्ये दर्शवा.
कोणत्याही उमेदवारांच्या नावासमोर केवळ एकच अंक नमूद करावा. एकच अंक एका पेक्षा जास्त उमेदवारांच्या नावासमोर नमूद करू नये. पसंतीक्रम हा केवळ अंकात दर्शविला जाईल (उदा. 1, 2, 3, इत्यादी), तो एक, दोन, तीन, इत्यादी असा शब्दात दर्शवू नये. अंक हे भारतीय आंतरराष्ट्रीय अंक स्वरुपात जसे 1, 2, 3, इत्यादी किंवा रोमन स्वरुपातील I, II, III, इत्यादी किंवा संविधानाच्या आठव्या अनुसूचितील भारतीय भाषेतील अंकाच्या स्वरुपात नोंदविता येतील.
मतपत्रिकेवर स्वाक्षरी किंवा आद्याक्षरे किंवा नाव किंवा कोणतेही शब्द नमूद करू नये. तसेच अंगठ्याचा ठसा उमटवू नये. पसंतीक्रम दर्शविण्यासाठी मतपत्रिकेवर उमेदवाराच्या नावासमोर (✔️) किंवा (✖️) अशी खुण करू नये. अशी मतपत्रिका बाद ठरेल. तुमची मतपत्रिका वैध ठरण्यासाठी उमेदवारांपैकी एकाच्या नावासमोर 1 हा अंक नमूद करून तुमचा पहिला पसंतीक्रम दर्शविणे आवश्यक आहे. इतर पसंतीक्रम हे ऐच्छिक स्वरुपाचे असून ते अनिवार्य नाहीत, असे जिल्हाधिकारी तथा औरंगाबाद शिक्षक मतदारसंघाचे सहाय्यक निवडणूक निर्णय अधिकारी पृथ्वीराज बी. पी. यांनी कळविले आहे.
****