मुंबई : गेल्या ४८ वर्षांपासून ज्या काँग्रेस पक्षासोबत माझा प्रवास सुरू होता, तो प्रवास मी थांबवतोय. गेल्या १५ दिवसांपूर्वी काँग्रेस पक्षातील माझ्या वरिष्ठांना मी पक्ष सोडणार असल्याची कल्पना दिली आहे. काँग्रेस पक्षातून नॅशनलिस्ट काँग्रेस पक्षात मी प्रवेश करतो आहे. अजित पवार यांच्या नेतृत्वाखाली मी काम करणार आहे, अशी मोठी घोषणा बाबा सिद्धीकी यांनी केली. बाबा सिद्धिकी यांच्या अजित पवार गटातील प्रवेशाच्या चर्चा होत होत्या. अखेर या चर्चांवर आज त्यांनीच शिक्कामोर्तब केलं. त्याचवेळी काँग्रेस पक्षातील काही लोक तुमच्यासोबत येणार आहेत का? असा प्रश्न पत्रकारांनी विचारल्यावर आगे आगे देखो होता है क्या… असा शायराना इशारा बाबा सिद्धिकी यांनी जाताजाता काँग्रेसला दिला.
बाबा सिद्धिकी काय म्हणाले?
माझा प्रवास इंदिरा गांधी-राजीव गांधी-संजय गांधी यांच्यासोबत राहिला. सध्याचे काँग्रेस अध्यक्ष मल्लिकार्जून खरगे हे माझ्या पित्यासमान आहेत. मोहन प्रकाश माझ्या मोठ्या भावाप्रमाणे आहेत. परंतु कधी कधी व्यक्तिगत जीवनात काही निर्णय घ्यावे लागेल. मी पक्ष सोडून जातोय हे माझ्या वरिष्ठांना सांगून मी निर्णय घेतलाय, असं त्यांनी सांगितलं.
काहीतरी झालं असेल म्हणूनच मी काँग्रेस पक्षाच्या सदस्यत्वाचा राजीनामा दिला असेल. मी शिस्त असलेला कार्यकर्ता आहे. घरातील गोष्टी बाहेर सांगणार नाही. काही गोष्टी न सांगणं योग्य असतं. माझ्यासोबत काँग्रेसमधल्या ४८ वर्षांतील प्रवासात मला साथ दिलेले कार्यकर्ते-नेते यांच्या उपस्थितीत मी १० तारखेला जाहीर सभेचं आयोजन केलं आहे. त्यातील काही जिल्हा परिषद सदस्य आहेत, काही नगरसेवक आहेत. जे माझ्यासोबत काम करण्यास आणि माझ्या पुढील प्रवासातही सोबतीचा विचार करत आहेत, त्यांना घेऊन मी अजित पवार यांच्या पक्षात जाईन. त्या पक्षाची ताकद वाढवेन.
बाबा सिद्धिकी यांच्याकडून अजित पवार यांचं कौतुक
अजित पवार प्रशंसेला पात्र आहेत. ज्यावेळी मी मंत्री होतो, त्यावेळी एका कार्यकर्त्यासाठी, पदाधिकाऱ्यासाठी ते माझ्या कार्यालयात यायचे, हे अजित पवार यांचं मोठेपण होतं. एखाद्या कार्यकर्त्याचं काम झालं पाहिजे, अशी त्यांची त्यामागची धारणा होती. अशा नेत्याच्या नेतृत्वाखाली काम करायला आवडेन, अशी प्रतिक्रिया सिद्धिकी यांनी दिली.
सिद्धिकी यांना राज्यसभा मिळणार?
बाबा सिद्धिकी यांनी अजित पवार गट राज्यसभेवर पाठविणार असल्याच्याही चर्चा आहेत. हा प्रश्नही पत्रकारांनी विचारल्यावर बाबा सिद्धिकी यांनी स्पष्ट शब्दात इन्कार केला. ‘पक्षात प्रवेश करताना मला कुठलीही कमेंटमेंट केली गेली नाहीये’, असं त्यांनी सांगितलं.