मुंबई: अयोध्येतील राम मंदिरात २२ जानेवारीला प्रभू रामाची मूर्तीची प्रतिष्ठापना करण्यात येईल. या सोहळ्याची जय्यत तयारी अयोध्या नगरीत सुरू आहे. या सोहळ्याचं आमंत्रण विरोधी पक्षातील नेत्यांनादेखील देण्यात आलं आहे. पंतप्रधान नरेंद्र मोदी या सोहळ्याचे प्रमुख अतिथी असतील. प्राणप्रतिष्ठा सोहळ्याला काँग्रेसचे अध्यक्ष मल्लिकार्जुन खरगे आणि माजी अध्यक्षा सोनिय गांधी अनुपस्थित असतील. अखिलेश यादव, ममता बॅनर्जी यांच्यापाठोपाठ राष्ट्रवादी काँग्रेसचे अध्यक्ष शरद पवारांनी त्यांची भूमिका स्पष्ट केली आहे.श्रीराम जन्मभूमी तीर्थक्षेत्राचे महासचिव चंपत राय यांना शरद पवारांनी एक पत्र लिहिलं आहे. २२ जानेवारीला प्राणप्रतिष्ठा सोहळा संपन्न झाल्यानंतर मी वेळ काढून दर्शनासाठी येईन. तेव्हापर्यंत राम मंदिराचं कामदेखील पूर्ण झालेलं असेल, असं पवारांनी राय यांना लिहिलेल्या पत्रात नमूद केलं आहे. राम मंदिराचा वापर भाजप राजकीय हेतूनं करतोय की व्यावसयिक उद्देशानं, हे कळायला मार्ग नाही. पण राम मंदिर होतंय याचा आनंद आहे. त्यासाठी अनेकांनी योगदान दिलं आहे, असं पवार काही दिवसांपूर्वीच म्हणाले होते.
चंपत राय यांना पवारांनी लिहिलेल्या पत्रात काय?
मर्यादा पुरुषोत्तम श्रीराम भारतच नव्हे, जगातील कोट्यवधी भक्तांच्या श्रद्धा आणि आस्थेचं प्रतीक आहेत. अयोध्येतील सोहळ्याच्या पार्श्वभूमीवर राम भक्तांमध्ये उत्सुकता आणि आतुरता आहे. ते मोठ्या संख्येनं अयोध्येत पोहोचत आहेत. त्यांच्या माध्यमातून या ऐतिहासिक सोहळ्याचा आनंद माझ्यापर्यंत पोहोचेल. २२ जानेवारीला होणाऱ्या प्राणप्रतिष्ठेनंतर रामललाचं दर्शन सहज आणि निवांतपणे घेता येईल. माझा अयोध्येला येण्याचा विचार आहे. तेव्हा रामललाजींचं दर्शन करेन. तोपर्यंत राम मंदिराचं बांधकाम पूर्ण झालेलं असेल, असं पवारांनी पत्रात नमूद केलं आहे. पत्राच्या अखेरीस त्यांनी चंपत राय यांचे आमंत्रणासाठी आभार मानले आहेत. सोहळ्याच्या यशस्वी आयोजनासाठी त्यांनी राय यांना शुभेच्छा दिल्या आहेत.