रिजर्व्ह बँक ऑफ इंडिया म्हणजे RBI नं ऑनलाइन पेमेंट करणाऱ्यांना मोठा दिलासा दिला आहे. आरबीआयनं यूपीआय पेमेंटच्या नियमांमध्ये बदल केले आहेत, ज्यामुळे यूपीआय युजर्स १ लाख रुपयांपर्यंत ऑटो पेमेंट करता येईल. विशेष म्हणजे ही लिमिट १५ हजार रुपयांपर्यंत होती, ज्यात सुमारे ६ पट वाढ झाली आहे.
काय होईल फायदा?
यूपीआय ऑटो पेमेंट सर्व्हिसचा वापर अनेक प्रकारच्या ऑनलाइन पमेंट जसे की क्रेडिट कार्ड बिलचं पेमेंट, विमा प्रीमियम, म्यूचुअल फंडसाठी केला जातो. त्याचबरोबर ह्यात ईएमआय पेमेंट, मोबाइल बिल, एंटरटेनमेंट आणि ओटीटी सब्सक्रिप्शन, वीज बिल, म्यूचुअल फंड आणि विम्याचा समावेश आहे. याआधी १५ हजार किंवा त्यापेक्षा जास्त रुपयांचा व्यवहार करण्यासाठी ओटीपीची आवश्यकता होती. परंतु आता ओटीपीविना एक लाख रुपयांपर्यंत ऑटो पेमेंट करता येईल.
मिळू शकते अतिरिक्त सूट
रिजर्व्ह बँक ऑफ इंडियाचे गव्हर्नर शक्तीकांत दास ह्यांनी एज्युकेशन इंस्टीट्यूट आणि हॉस्पिटल मध्ये यूपीआय पेमेंट लिमिट वाढवणार असल्याची हिंट दिली आहे. जी एक लाख रुपयांवरून पाच लाख रुपये केली जाऊ शकते. त्यामुळे उपचार आणि शिक्षणासाठी ऑनलाइन पेमेंट करणं सोपं होईल.
यूपीआय युजर्सची संख्या वाढली
भारतात यूपीआय पेमेंटच्या संख्येत मोठ्या प्रमाणात वाढ झाली आहे, ज्यामुळे भारतात यूपीआय पेमेंट करणाऱ्या युजर्सच्या संख्येत सतत वाढ होत आहे. एनपीसीआयची आकडेवारी पाहता मागील महिन्यात नोव्हेंबरमध्ये ११.२३ अब्जापेक्षा जास्त यूपीआय व्यवहार झाले आहेत.
ऑटो पे म्हणजे काय
मोबाईल बिल, वीज बिल, ईएमआय पेमेंट, मनोरंजन/ओटीटी सबस्क्रिप्शन, विमा, म्युच्युअल फंड आणि कर्जाची देयके हे काही खर्च असे आहेत, जे आपल्याला नियमित कालावधीनंतर भरावे लागतात. या खर्चाची ऑनलाइन भरपाई करण्यासाठी तुम्ही कोणत्याही यूपीआय (UPI) अॅप्लिकेशनमध्ये ऑटोपे सेट करू शकता.
ऑटोपे सेट केल्यानंतर, आपल्याला नियमित कालावधीनंतर वारंवार पेमेंट करण्याची आवश्यकता भासणार नाही. फक्त या सुविधेचा लाभ तुम्हाला १०००० रुपयांपेक्षा कमी देयकांमध्ये घेता येऊ शकतो. UPI AutoPay द्वारे एक लाखांपेक्षा जास्त पेमेंट करण्यासाठी तुम्हाला तुमचा यूपीआय पिन टाकावा लागेल.