भाजपला भगदाड, भाजपच्या दिग्गज नेत्याचा ठाकरे गटात प्रवेश

एकनाथ पवार हे पिंपरी चिंचवड महापालिकेचे नगरसेवक होते. तसेच त्यांच्यावर भाजप प्रवक्तेपद आणि शहरप्रमुख म्हणूनही जबाबदारी देण्यात आली होती. मात्र पिंपरी चिंचवडमधील अंतर्गत राजकारणाला कंटाळून एकनाथ पवार यांनी ठाकरे गटात प्रवेश केला आहे. यावेळी उद्धव ठाकरे यांनी एकनाथ पवार यांच्यावर पक्षाच्या संघटकपदाची जबाबदारी दिली आहे.यावेळी एकनाथ पवार म्हणाले, काही दिवसांपूर्वी संजय राऊत यांची भेट घेतली होती. त्यानंतर मी पक्षात येण्याचा निर्णय घेतला. यापुढे पिंपरी चिंचवड बरोबरच नांदेड जिल्ह्यातील लोहा कंधार मतदारसंघात शिवसेना वाढवण्यासाठी प्रयत्न करणार आहे. यावेळी उद्धव ठाकरे म्हणाले, भाजपने आपल्या पक्षाच्या नेत्यांचे खच्चीकरण केले. तसेच माझ्याकडे काहीही नसताना एकनाथ पवार माझ्याकडे आले आहेत. त्यांना मी काहीही देऊ शकत नाही. मात्र एकनाथ पवार यांनी जशी पिंपरी चिंचवड आणि नांदेड जिल्ह्यात काम केले. तसेच काम महाराष्ट्रभर करावं.

एकनाथ पवार यांनी भाजप का सोडली?

एकनाथ पवार हे भाजपचे निष्ठावान कार्यकर्ते होते. तसेच ते नितीन गडकरी यांचे निकटवर्तीय मानले जात होते. मात्र पिंपरी चिंचवडमध्ये भाजप आमदार महेश लांडगे यांचा वाढता हस्तक्षेप, तसेच स्थायी समितीच्या अध्यक्षपदी डावलल्यामुळे निर्माण झालेली नाराजी, त्यांना डावलून उमा खापरे यांना दिलेली विधान परिषदेची संधी या कारणांमुळे एकनाथ पवार यांनी भाजप सोडल्याची चर्चा आहे. त्याबरोबरच पिंपरी चिंचवडमधून भाजपच्या वतीने संधी मिळण्याची शक्यताही कमी असल्याने एकनाथ पवार यांनी ठाकरे गटात प्रवेश केला आहे.