संजय गांधी निराधार योजना आणि श्रावणबाळ योजनेचे लाभार्थी आहात? दिवाळी गोड होणार, सरकारने अनुदान वाढवले

ऐन दिवाळीच्या तोंडावर राज्य सरकारने राज्यातील निराधारांना देण्यात येणाऱ्या अनुदानात वाढ केली आहे. आता एक हजार ऐवजी दीड हजार रुपयांची रक्कम निराधारांच्या हातात पडणार असल्याने निराधारांची दिवाळी गोड होणार आहे. पुणे जिल्ह्यातील संजय गांधी निराधार योजनेसह श्रावणबाळ सेवा राज्य निवृत्तीवेतन योजनेंतर्गत सुमारे १३ कोटी रुपयांचे अनुदान सरकारने जिल्हाधिकाऱ्यांना पाठविले आहे.राज्य सरकारने संजय गांधी निराधार अनुदान योजना आणि श्रावणबाळ सेवा राज्य निवृत्तीवेतन या योजनेमधून सुमारे दीड हजार कोटींचे अनुदान जिल्ह्यांना वितरीत केले आहे. येत्या महिनाभरात ते लाभार्थ्यांच्या खात्यात जमा करण्यात येणार आहेत. त्या संदर्भात सरकारने सर्व जिल्हाधिकाऱ्यांना सूचना दिल्या आहेत. निराधारांना दरमहा संजय गांधी निराधार अनुदान योजनेतंर्गत ५५६ कोटी तसेच श्रावणबाळ सेवा राज्य निवृत्तीवेतन योजनेतंर्गत ९४० कोटी असा एकूण एक हजार ४९६ कोटी रुपयांचा निधी सर्व जिल्हाधिकारी कार्यालयांना पाठविण्यात आला आहे. त्यामुळे लाभार्थ्यांना आता एक ऐवजी दीड हजार रुपयांची रक्कम मिळणार आहे.