बीड : सिक्कीम येथे मंगळवारी रात्री पहाटे दीड वाजण्याच्या सुमारास अचानक ढगफुटी झाली. तिथे कर्तव्यावर असलेले मुळचे बीडचे जवान पांडुरंग वामन तावरे या पुरामध्ये वाहून गेले. सुमारे तीन दिवसांपासून ते बेपत्ता होते. पुराच्या पाण्यात त्यांचा मृतदेह तरंगत होता. त्यांचे मूळगाव असलेल्या पाटोदा तालुक्यातील काकडहिरा या गावी त्यांचे पार्थिव उद्या आणण्यात येणार आहे. त्यानंतर त्यांच्या पार्थिवावर अंत्यसंस्कार करण्यात येतील.सिक्कीममध्ये मंगळवारी पहाटे दीड ते दोन वाजण्याच्या सुमारास ढगफुटी झाली. त्यामुळे तिस्ता नदीला मोठा पूर आला होता. नदीच्या पाण्याची पातळी १५ ते २० फुटांनी वाढली. यानंतर नदीलगतचा भाग पाण्याखाली आला. नदीलगतच्या परिसरात लष्कराची छावणी होती. ती पुरामध्ये वाहून गेली आणि तेथे असलेली सैन्य दलाची वाहने देखील वाहून गेली. शहीद झालेल्या जवानांमध्ये बीड जिल्ह्यातील पाटोदा तालुक्यातील जवान पांडुरंग वामन तावरे ( वय ३६ ) हे बेपत्ता झाले होते. आज त्यांचा मृतदेह सापडला आहे.
पर्यटक अडकले
ढगफुटीनंतर आलेल्या पुरामुळे सिक्कीममध्ये हाहाकार माजला आहे. यामुळे पर्यटनासाठी गेलेले देशभरातील पर्यटक अडकून पडले आहेत. यात सिल्लोड येथील दोन कुटुंबातील आठ जण अडकल्याची माहिती समोर आली आहे. या कुटुंबियांना मदत करण्याची विनंती अल्पसंख्यांक व पणनमंत्री अब्दुल सत्तार यांनी सिक्कीम सरकारला पत्राद्वारे केली आहे. दरम्यान, हे दोन्ही कुटुंब सुखरुप असल्याची माहिती जिल्हा प्रशासनाने दिली आहे.
२९ सप्टेंबर रोजी सिल्लोडमधील जैन आणि सहारे अशी दोन कुटुंब सिक्कीममध्ये पर्यटनासाठी गेली. सिक्कीममध्ये महापूर आल्याचे कळताच कुटुंबियांनी त्यांच्याशी संपर्क साधण्याचा प्रयत्न केला. मात्र, संपर्क न झाल्याने कुटुंबिय चिंताग्रस्त झाले होते.
दरम्यान, कुणाल सहारे, राजश्री सहारे, स्नेहा जैन, शीतल जैन, मोक्षा जैन, सिध्दांत जैन यासह कुटुबांतील सर्व आठ जण सुरक्षित असल्याचे जिल्हा प्रशासनातर्फे सांगण्यात आले. सहारे आणि जैन कुटुंब सिक्कीमच्या लाचून येथील यशश्री हॉटेलात सुखरुप असल्याची माहिती नियंत्रण कक्षाने जिल्हा प्रशासनाला कळविली आहे.