मराठा आंदोलकांवरील लाठीचार्जमुळे संताप:राज्यात अनेक ठिकाणी रास्ता रोको, बंदची हाक; जालन्यात गोळीबार, दगडफेक

मराठा आरक्षणाच्या मागणीसाठी जालना येथील आंतरवाली सराटा गावात चार दिवसांपासून शांततेत उपोषण करणाऱ्या आंदोलकांवर पोलिसांनी शुक्रवारी अमानुष लाठीमार केला. त्याचे संतप्त पडसाद आता राज्यभरात उमटत आहे. राज्यातील अनेक जिल्ह्यांत या प्रकरणी बंद व रास्ता रोकोचे हत्यार उपसण्यात आले. अनेक ठिकाणी मराठा समाज रस्त्यावर उतरला आहे.

LIVE UPDATE

मुख्यमंत्र्यांनी राजीनामा द्यावा- पृथ्वीराज चव्हाण

जालना जिल्ह्यातील सराटी येथे झालेल्या लाठीचार्ज प्रकरणी माजी मुख्यमंत्री तथा काँग्रेसचे ज्येष्ठ नेते पृथ्वीराज चव्हाण यांनी राज्य सरकारवर निशाणा साधला आहे. या प्रकरणी दोषींवर कारवाई करुन मुख्यमंत्री एकनाथ शिंदे यांनी गृहमंत्री देवेंद्र फडणवीस यांचा राजीनामा घेण्याची मागणी देखील पृथ्वीराज चव्हाण यांनी केली आहे. या संदर्भात त्यांनी मुख्यमंत्री एकनाथ शिंदे यांना एक पत्रही लिहिले आहे.

जालन्यात आज रास्ता रोको, बससेवा पूर्ण ठप्प

जालना शहरातील अंबड चौफुलीजवळ आज 2 सप्टेंबर रोजी सकाळी 10 वाजता रास्ता रोको आंदोलन करण्यात येणार आहे. भूसार मार्केट बंद ठेवण्यात येणार आहे. ​सुरक्षेच्या दृष्टीने गेवराई-शेवगाव मार्ग पोलिसांनी बंद केला. छत्रपती संभाजीनगरकडे जाणारी वाहने शेवगाव मार्गाने वळवण्यात आली. याठिकाणी कडेकोट पोलिस बंदोबस्त तैनात करण्यात आला होता. गेवराई, संभाजीनगरकडे जाणाऱ्या बस डेपोत ठेवल्या असून सोडलेल्या नाहीत. गेवराईतून पुणे, मुंबईकडे जाणाऱ्या बसेस सध्या बंद आहेत. रस्ता सुरळीत होईल तेव्हा सोडण्यात येतील, असे बीडचे एसटी विभागाचे विभाग नियंत्रक अजय मोरे यांनी सांगितले.

बीड : मराठा समाजातर्फे आज जिल्हा बंद

गेवराईत शुक्रवारी निषेध आंदोलन करण्यात आले. त्यानंतर बीड शहरात मराठा क्रांती मोर्चातर्फे बैठक झाली व आज शनिवारी जिल्हा बंदची हाक देण्यात आली आहे.

संभाजीनगरमध्ये बस पेटवली

छत्रपती संभाजीनगरमध्ये रात्री 12 वाजता मध्यवर्ती बसस्थानकात कोल्हापूर आगाची बस मागून जाळण्यात आली. तर सिडको बसस्थानकात पैठण फलाटावर उभी बस फोडण्यात आली. तसेच, धाराशिव जिल्हा बंदची हाकही आज सकल मराठा समाजाच्या वतीने देण्यात आली आहे. छत्रपती शिवाजी महाराज चौकात सकाळी 9 वाजता निषेध नोंदवण्यात येणार आहे.

शरद पवार घेणार आंदोलकांची भेट

मराठा आरक्षणासाठी आंतरवाली सराटी (ता.अंबड) येथे चार दिवसांपासून उपोषण करणाऱ्या मराठा आंदोलकांवर पोलिसांनी लाठीमार केल्याने 20 आंदोलक जखमी झाले.या आंदोलकांना भेटण्यासाठी राष्ट्रवादी काँग्रेसचे अध्यक्ष शरद पवार आज जालना जिल्ह्यात येणार आहे.

मराठा क्रांती मोर्चाची आज बैठक

दरम्यान, जालन्यातील घटनेमुळे मराठा क्रांती मोर्चाही आता आक्रमक झाला आहे. आंदोलकांवर झालेल्या लाठीमाराबाबत पुढे काय भूमिका घ्यायची? मराठा आरक्षणाच्या मागणीसाठी पुढील आंदोलनाची दिशा काय? यावर चर्चा करण्यासाठी आज मुंबईत मराठा क्रांती मोर्चाची बैठक होत आहे. यासह राज्यात ठिकठिकाणी मराठा क्रांती मोर्चातर्फे बैठकांचे आयोजन करण्यात आले आहे. कोल्हापुरात आज दुपारी मराठा क्रांती मोर्चाची पत्रकार परिषद होत आहे.