आगामी लोकसभा निवडणुकीत जास्तीत जास्त जागा मिळवण्याचा भाजपचा प्रयत्न आहे. त्या दृष्ट्रीने पक्षाची तयारी देखील सुरू झाली आहे. मात्र, त्यातच भाजप एक मास्टर स्ट्रोक खेळण्याची शक्यता वर्तवली जात आहे. पंतप्रधान नरेंद्र मोदी पुणे लोकसभा मतदार संघातून निवडणुकीला उतरण्याची शक्यता वर्तवली जात आहे. तसे झाल्यास महाराष्ट्र भाजपला मोठा फायदा होण्याचीही शक्यता आहे.
देशात पुढील वर्षी लोकसभा निवडणूका येऊ घातल्या आहेत. त्यासाठी भाजपसह इतर पक्षांनी निवडणुकांची जोरदार तयारी सुरु केली आहे. एनडीए सह इंडिया आघाडीच्या बैठकांचे सत्र सध्या महाराष्ट्रात सुरु आहे. अशातच आता पंतप्रधान नरेंद्र मोदी हे पुण्यातून लोकसभा निवडणूक लढवणार असल्याची चर्चा सुरु झाल्याने निवडणुकीची रंगत चांगलीच वाढणार आहे.
संजय काकडे यांचे मोदींना पत्र
पंतप्रधान नरेंद्र मोदी यांनी पुणे लोकसभा मतदार संघावून निवडणूक लढवावी यासाठी भारतीय जनता पक्षाचे नेते संजय काकडे यांनीच मोदींना एक पत्र लिहिले आहे. त्या पत्रात त्यांनी मोदींनी पुणे लोकसभा मतदार संघातून निवडणूक लढवण्याची मागणी केली आहे. या संदर्भात बोलताना संजय काकडे म्हणाले की, पंतप्रधान नरेंद्र मोदी यांनी पुण्यातून निवडणूक लढवली तर इतिहासात नसेल झाला इतका मोठा प्रचंड विजय आम्ही पुण्यातून मिळवून देवू. सर्व विरोधकांचे डिपॉजिट आम्ही जप्त करू, असा दावा देखील संजय काकडे यांनी केला आहे.
तर पुण्याचे भाग्य उजळेल
पंतप्रधान नरेंद्र मोदी सध्या वाराणसी मतदार संघातून खासदार आहेत. आपल्या व्यस्त कार्यक्रमात देखील ते आपल्या मतदारसंघासाठी वेळ काढतात. त्यामुळे वाराणसी शहराचा मोठ्या प्रमाणात विकास झाला आहे. ते पाहाता जर पंतप्रधान नरेंद्र मोदी यांनी पुण्यातून निवडणूक लढवली तर राज्यातील 48 पैकी 48 खासदार भाजपचे निवडून येतील. राज्याचे आणि पुण्याचे भाग्य उजळेल, असा विश्वास संजय काकडे यांनी व्यक्त केला आहे.
रवींद्र धंगेकर यांनीही थोपटले दंड
पुणे लोकसभा मतदार संघावर काँग्रेसचा दावा सांगितला जात आहे. त्यामुळे काँग्रेसचे आमदार रवींद्र धंगेकर यांनी आधीच या मतदार संघातून निवडणूक लढवण्याची इच्छा व्यक्त केली आहे. पंतप्रधान नरेंद्र मोदी जर निवडणुकीच्या रिंगणात असतील तर आपण त्यांच्या विरोधात निवडणुकीच्या रिंगणात उतरण्यात तयार असल्याचे धंगेकर यांनी म्हटले आहे.