अल्पसंख्याक संस्थांच्या अनुदानासाठी  प्रस्ताव सादर करण्यास मुदतवाढ

अल्पसंख्याक संस्थांच्या अनुदानासाठी  प्रस्ताव सादर करण्यास मुदतवाढ

• 10 ऑगस्टपर्यंत प्रस्ताव सादर करता येणार

लातूर, दि. 25 (जिमाका) : धार्मिक अल्पसंख्याक विद्यार्थी बहुल शासनमान्य खाजगी अनुदानित, विनाअनुदानित, कायम विनाअनुदानित शाळा, कनिष्ठ महाविद्यालये, औद्योगीक प्रशिक्षण संस्था, नगरपालिका, नगरपरिषदशाळा व दिव्यांगांच्या शाळांमध्ये पायाभूत सोयीसुविधा पुरविण्यासाठी अनुदान योजना सन 2023-24 मध्ये राबविण्यात येत आहे. अल्पसंख्याक विकास विभागाच्या 18 जुलै 2023 रोजीच्या पत्रानुसार ही योजना राबविण्यास मुदतवाढ देण्यात आली आहे. त्यामुळे या योजनेसाठी 10 ऑगस्ट 2023 पर्यंत प्रस्ताव स्वीकारले जाणार आहेत.

अल्पसंख्यांक विभागाच्या 7 ऑक्टोबर 2015 रोजीच्या शासन निर्णयानुसार राज्यातील धार्मिक अल्पसंख्याक विद्यार्थी बहुल शासनमान्य खाजगी शाळा, कनिष्ठ महाविद्यालये, औद्योगीक प्रशिक्षण संस्था व अपंग शाळांमध्ये पायाभूत सुविधा पुरविण्यासाठी अनुदान योजना राबविण्यात येत आहे. या योजनेसाठी संस्था चालकांनी 10 ऑगस्ट 2023 पर्यंत विहित नमुन्यातील परिपूर्ण प्रस्ताव, शासन निर्णयाप्रमाणे जिल्हा नियोजन अधिकारी, नवीन जिल्हाधिकारी कार्यालय, बार्शी रोड, लातूर या कार्यालयात सादर करावेत. मुदतीनंतर प्राप्त प्रस्ताव विचारात घेतले जाणार नाहीत, असे जिल्हा नियोजन अधिकारी एम. एस. दुशिंग यांनी कळविले आहे.

डॉ. झाकीर हुसेन मदरसा आधुनिकीकरण योजनेसाठी

प्रस्ताव सादर करण्यास 10 ऑगस्टपर्यंत मुदतवाढ

लातूर, दि. 25 (जिमाका): राज्यातील नोंदणीकृत मदरसांच्या आधुनिकीकरणासाठी 11 ऑक्टोबर 2013 रोजीच्या शासन निर्णयानुसार डॉ. झाकीर हुसेन मदरसा आधुनिकीकरण योजना राबविण्यात येत आहे. 31 मे 2023 रोजीच्या पत्रान्वये ही योजना सन 2023-24 मध्ये राबविण्यात येत असून या योजनेसाठी अर्ज स्वीकारण्यास 10 ऑगस्ट 2023 पर्यंत मुदतवाढ देण्यात आली आहे.

डॉ. झाकीर हुसेन मदरसा आधुनिकीकरण योजनेअंर्गत संस्था चालक, मदरसा चालकांनी शासन निर्णयाप्रमाणे विहीत नमुन्यातील परिपूर्ण प्रस्ताव 10 ऑगस्ट 2023 रोजी सायंकाळी 5 वाजेपर्यंत जिल्हा नियोजन अधिकारी, नवीन जिल्हाधिकारी कार्यालय, बार्शी रोड, लातूर येथे सादर करावेत, असे आवाहन जिल्हा नियोजन अधिकारी एम. एस. दुशिंग यांनी प्रसिध्दी पत्रकाद्वारे कळविले आहे.