मुंबई : बदलत्या राजकीय परिस्थितीनंतर विधान परिषदेतील विरोधीपक्ष नेता कोण? हे अद्याप ठरले नाही. हे पद राष्ट्रवादीकडे राहणार की काँग्रेसकडे जाणार? काँग्रेसकडे गेले तर त्यांच्यापैकी कोणाला संधी मिळणार, हे अद्याप स्पष्ट झालेले नाही. मात्र, संभाव्य नेत्यांमध्ये नगर जिल्ह्यातील काँग्रेसचे ज्येष्ठ नेते बाळासाहेब थोरात यांचे नाव घेतले जाते. आपले नाव कसे योग्य आहे? हे दाखवून देण्याची संधीच थोरात यांनी आज साधली. अधिवेशनाच्या दुसऱ्या दिवशी त्यांचा आवेश विरोधीपक्ष नेत्याप्रमाणेच पहायला मिळाला. आपल्या जिल्ह्यातील आणि राज्यातील अन्य प्रश्न मांडतानाच मंत्र्यांनी अभयास करून उत्तरे द्यावीत, या मुद्द्यावरूनही थोरात यांनी सरकारला चांगले धारेवर धरले. विधानसभेत सध्या विरोधा पक्ष नेत्याची खुर्ची रिकामी आहे, याची उणीव यामुळे आज तरी भासली नाहीराज्य विधिमंडळाचे अधिवेशन कालपासून सुरू झाले आहे. अद्याप विरोधीपक्ष नेत्याची नियुक्ती झालेली नाही. एका बाजूला नवीन मंत्र्यांचा समावेश झाल्याने, खाते बदलामुळे सरकारच्या पातळीवर गोंधळाचे वातावरण आहे. अशावेळी सरकारला कोंडीत पकडणे सोपे असले तरी अधिकृतपणे विरोधीपक्ष नेताच नाही. अशाही परिस्थिती विरोधीपक्षाचे आमदार आपापल्या पद्धतीने प्रश्न विचारताना दिसले.
यामध्ये थोरात यांचे वेगळे रूप पहायला मिळाले. मंत्र्यांकडून समाधानकारक उत्तर मिळत नसल्याचे पाहून थोरात बोलायला उभे राहिले. त्यांनी यावरून अध्यक्षांच्या मार्फत सरकारला चांगलेच सुनावले.
थोरात म्हणाले, विधिमंडळाचे पावसाळी अधिवेशन सुरु आहे पण राज्य सरकारमधील अनेक मंत्री बिना तयारीने सभागृहात येत आहेत. त्यांच्याकडे प्रश्नांची उत्तरे नाहीत ते कुठला अभ्यास करत नाहीत. जनतेचे प्रश्नाकडे गांभीर्याने पाहण्याची ते सोडवण्याची त्यांची इच्छाशक्ती नाही. प्रत्येक प्रश्नाचे उत्तर उपमुख्यमंत्र्यांनी द्यावे हे सरकारसाठी शोभनीय नाही. विधिमंडळ सदस्य सरकारकडून उत्तराची अपेक्षा ठेवतात पण कोणताही मंत्री समाधानकारक उत्तर देत नाही, प्रत्येक प्रश्नाच्या उत्तरासाठी वारंवार उपमुख्यमंत्र्यांना उभे राहावे लागते हे या सभागृहाला शोभत नाही. विधानसभेच्या सन्माननीय अध्यक्ष यांनी मंत्र्यांना सक्त ताकीद द्यावी आणि विना तयारी सभागृहात येऊ नये अशा सूचना कराव्यात अशी मागणी थोरात यांनी केली.मंत्र्यांची तयारी नसणे आणि सतत फडणवीस यांनीच हस्तक्षेप करून उत्तरे देणे या दोन्ही गोष्टींवर थोरात यांनी बोट ठेवले. विरोधीपक्ष नेतेपद थोरात यांना द्यावे, अशी मागणी त्यांच्या पक्षातील अनेक कार्यकर्त्यांकडूनही होत आहे. थोरात शांत आणि संयमी स्वभावाचे असल्याचे विरोधीपक्ष नेते पदासाठी उपयोग होईल का? असा प्रश्नही काहींकडून उपस्थित केला जातो. मात्र, यांना आज थोरात यांनी कृतीतून उत्तर दिल्याचे दिसून आले. त्यांच्या स्टाईलने त्यांनी सरकारला कोंडीत पकडण्याचा प्रयत्न केल्याचे दिसून आले. त्यामुळे आता पुन्हा या पदासाठी त्यांच्या नावाची चर्चा सुरू झाली आहे.