अमरावती : शिवसेनेतील फुटीनंतर माजी मुख्यमंत्री उद्धव ठाकरे पहिल्यांदाच विदर्भाच्या दौऱ्यावर आले आहेत. उद्धव ठाकरे दोन दिवसाच्या विदर्भ दौऱ्यावर आहेत. काल यवतमाळमध्ये शिवसैनिकांशी संवाद साधल्यानंतर उद्धव ठाकरे आज अमरावतीत आले आहेत. अमरावतीत त्यांनी शिवसैनिकांशी संवाद साधला. यावेळी त्यांनी भाजप आणि शिंदे गटावर जोरदार हल्ला चढवला. यावेळी त्यांनी भाजपचा उल्लेख नामर्द, घरफोडे आणि घरचेभेदी असा उल्लेख केला. तसेच भाजपला सत्तेची मस्ती आल्याची घणाघाती टीकाही त्यांनी केली.मी घरी बसून होतो. मान्य आहे. पण मी कुणाची घरं फोडली नाही. घर फोडे तुम्ही आहात. मी घरी बसून जी कामं केली, ती तुम्हाला घरं फोडून करता आली नाही. तुम्हाला दारं उरली नाही. तुम्हाला कोणी विचारत नाही. त्यामुळेच शासन आपल्या दारी सुरू आहे. सरकारी कर्मचाऱ्यांना कार्यक्रमात गर्दीसाठी बसवलं जात आहे. ही वेळ का आली तुमच्यावर? काम केली असती तर असे कार्यक्रम घेण्याची वेळ तुम्हाला वेळ आली नसती, अशी टीका उद्धव ठाकरे यांनी केली.
फोडाफोडी सुरू आहे
तुम्हाला माणसं विकत घेता येतात. आमदार विकत घेता येतात असं मी पाहतोय. पण आदिवासी भागातील माणसं वाचवा ना? तुम्हाला मतदारही विकत घ्यायची गरज पडणार नाही. फक्त फोडाफोडी सुरू आहे. सर्वोत्तम मुख्यमंत्री म्हणून माझं नाव येत होतं. जगात नरेंद्र मोदी नंबर एकचे पंतप्रधान आहेत. तरीही इतर पक्ष का फोडत आहात. कशासाठी?, असा सवाल त्यांनी केली.
भाजपला सत्तेची मस्ती
तुमच्यावर ही वेळ का आली? मस्ती आणि आत्मविश्वास हे दोन शब्द आहेत. यातील भाजपला सत्तेची मस्ती आली आहे. पण त्यांना त्यांच्या ताकदीचा आत्मविश्वास नाही. निवडून येऊच शकत नाही ही धाकधूक आहे. त्यामुळेच समोर कुणालाच ठेवत नाही. मर्दाची अवलाद असाल तर सरकारी यंत्रणा बाजूला ठेवा आणि मैदानात या, असं आव्हानच त्यांनी दिलं. राजकारणातील नामर्द तुम्ही. तुमची ताकद कधी होती?, असा सवाल त्यांनी केला.
अरे मिटलं होतं सर्व
बाळासाहेब ठाकरे यांना अटक करणाऱ्या छगन भुजबळ यांच्या मांडीला मांडी लावून बसल्यानेच आम्ही बाहेर पडल्याचा दावा शिंदे गटाचे लोक करत होते. अरे भुजबळ हे मातोश्रीवर आले होते. बाळासाहेबांना भेटले होते. सर्व मिटलं होतं. जर बाळासाहेबांना अटक करणाऱ्या भुजबळाच्या मांडीला मांडी लावून मी बसलो होतो. तर तुम्ही भुजबळांच्या कशाला काय लावून बसला आहात? म्हणजे मांडीला मांडी, हाताला हात, डोक्याला डोकं. असं म्हणायचं होतं मला, असा चिमटा उद्धव ठाकरे यांनी काढताच एकच खोखो झाला.