नवी दिल्ली : बीसीसीआय ही जगातील सर्वात धनाढ्य क्रिकेट संघटना आहे. सध्याच्या घडीला बीसीसीआय ही सचिव जय शहा चालवतात, असे म्हटले जात आहे. पण आता वर्ल्ड कपपूर्वीच जय शहा यांची बीसीसीआयमधील विकेट पडणार असल्याचे म्हटले जात आहे. जय शहा हे बीसीसीआयमधून बाहेर का पडणार, याची दोन कारणं आता समोर आली आहे़त.
पहिलं कारण…
बीसीसीआयमध्ये सध्याच्या घडीला कोणताही निर्णय घ्यायचा असेल तर तो जय शहा यांच्याविना होऊ शकत नाही. सौरव गांगुली यांनाही बीसीसीआयबाहेर काढण्यासाठी जय शहा यांनी प्रयत्न केले, असे म्हटले जात होते. सध्याच्या घडीला जय शहा यांच्याविना बीसीसीआयमध्ये काहीच होऊ शकत नाही, असे म्हटले जात आहे. त्याचबरोबर जय शहा यांना काही वेळा सोशल मीडियावर जोरदार ट्रोलही केले जाते. त्यामुळे बीसीसीआयचे सचिवपद सोडण्याचा त्यांच्यावर दबाव असल्याचे म्हटले आहे. त्यामुळे वर्ल्ड कपपूर्वीच जय शहा यांची विकेट काढण्याचा प्रयत्न सुरु झाला असल्याचे म्हटले जात आहे. त्यामुळे त्यांचे सचिवपद जाण्यासाठी त्यांची एकाधिकारशाही हे पहिलं कारण ठरू शकते.
दुसरं कारण…
काही दिवसांपूर्वी विश्वचषकाचे वेळापत्रक जाहीर करण्यात आले. या विश्वचषकाच्या वेळापत्रकानंतर बऱ्याच भारतामधील संघटना या नाराज असल्याचे समोर आले आहे. कारण या विश्वचषकातील एकही सामना या राज्य संघटनांच्या शहरांमध्ये होणार नाहीत. त्याचबरोबर काही शहरांमध्ये फक्त सराव सामनेच ठेवण्यात आले आहेत, तर काही शहरांमध्ये महत्व नसलेले सामने ठेवण्यात आले आहेत. त्यामुळे बीसीसीआयमधील बऱ्याच राज्य संघटना दुखावल्या गेल्या आहेत. त्यामुळे या राज्य संघटना बंड करण्याच्या तयारीत आहेत, असे म्हटले जात आहे. त्यामुळे वर्ल्ड कपपूर्वीच जय शहा यांना बीसीसीआयमधून बाहेर काढायचे, अशी चर्चा सध्याच्या घडीला काही राज्य संघटनांमध्ये सुरु झाली आहे.
सध्याच्या घडीला जय शहा यांच्यासाठी फारसे चांगले वातावरण बीसीसीआयमध्ये नाही, असे म्हटले जात आहे. त्यामुळे वर्ल्ड कपपूर्वी त्यांची विकेट पडणार असल्याचे म्हटले जात आहे. त्यामुळे आता सर्वांचे लक्ष बीसीसीआयमधील घडामोडींकडे लागले आहे, त्याचबरोबर जय शहा यांचे पुढे काय होणार याची उत्सुकताही सर्वांना असेल.