मुंबई : राज्याच्या राजकारणात अत्यंत खळबळ उडवणारी बातमी समोर आली आहे. विरोधी पक्ष नेतेपदाची धुरा सांभाळणारे राष्ट्रवादीचे दिग्गज नेते अजित पवार सरकारमध्ये सहभागी झाले आहेत. अजित पवार यांनी पुन्हा एकदा उपमुख्यमंत्रिपदाची शपथ घेतली. अशा परिस्थितीत विद्यमान उपमुख्यमंत्री देवेंद्र फडणवीस यांचं राजकीय भवितव्य काय असणार, याची चर्चा आहे.
गेल्या काही काळात देवेंद्र फडणवीस यांचं केंद्रातील राजकीय वजन वाढल्याचं पाहायला मिळालं आहे. देवेंद्र फडणवीस हे पंतप्रधान नरेंद्र मोदी आणि गृहमंत्री अमित शाह यांचे निकटवर्तीय मानले जातात. याशिवाय अर्थशास्त्र विषयातील फडणवीसांची जाण पाहता त्यांना मोदी सरकारमध्ये अर्थ मंत्रिपदाची धुरा सोपवली जाण्याची शक्यता वर्तवली जात आहे. त्यामुळे महाराष्ट्राला दोन उपमुख्यमंत्री मिळणार की समीकरणं बदलणार, याची चर्चा रंगली आहे.महाराष्ट्राच्या राजकारणात ठीक एक वर्षांनी राजकीय भूकंप झाला आहे. एकनाथ शिंदे यांच्या सरकारला एक वर्ष पूर्ण होऊन काही तास उलटत नाहीत, तोच अजित पवार समर्थक आमदारांसह सत्तेत सहभागी झाल्याचं वृत्त समोर आलं. हा महाविकास आघाडीसाठी मोठा धक्का मानला जात आहे.
दरम्यान, अजित पवार यांच्यासह धनंजय मुंडे, छगन भुजबळ, हसन मुश्रीफ, दिलीप वळसे पाटील या दिग्गज नेत्यांची मंत्रिमंडळात वर्णी लागणार आहे. याशिवाय अदिती तटकरे, संजय बनसोडे, अनिल भाईदास पाटील, धर्मरावबाबा अत्राम यांचाही मंत्रिमंडळात समावेश होणार आहे. राष्ट्रवादीच्या ५४ पैकी ३० आमदारांचा सत्तेत समावेश होणार असल्याची माहिती आहे.अजित पवार यांची सकाळपासून आपल्या समर्थक आमदारांसोबत बैठक सुरू होती. यामध्ये दिलीप वळसे पाटील, हसन मुश्रीफ, छगन भुजबळ, किरण लहमाटे, निलेश लंके, धनंजय मुंडे, रामराजे निंबाळकर, दौलत दरोडा, मकरंद पाटील, अतुल बेणके, सुनिल टिंगरे, अमोल मिटकरी, आदिती तटकरे, शेखर निकम, निलय नाईक, अशोक पवार, अनिल पाटील, सरोज अहिरे हे आमदार अजित पवार यांच्या बैठकीला उपस्थित होते, अशी माहिती आहे