केसीआर अन॒ त्यांचं अख्खं मंत्रिमंडळ उद्या सोलापूर मुक्कामी; तीन हॉटेल बुक, नव्या घोषणेची शक्यता

तेलंगणाचे मुख्यमंत्री के. चंद्रशेखर राव आणि त्याच्या अख्खा मंत्रिमंडळाचा दोन दिवसांचा सोलापूर दौरा निश्चित झाला असून ते उद्या (ता. २६) सोलापूरकडे रवाना होणार आहेत. उद्या संध्याकाळी त्यांचा सोलापुरात मुक्काम असून परवा ते मंत्रिमंडळासह आषाढीला विठ्ठलाच्या दर्शनासाठी पंढरपुरात जाणार आहेत. केसीआर यांच्या वतीने श्री विट्ठल मंदिरावर हेलिकॉप्टरद्वारे पुष्पवृष्टी करण्याची जय्यत तयारी करण्यात आलेली आहे. मात्र, अजून त्यांना परवानगी मिळालेली नाही.

पंढरपूर तालुक्यातील सरकोली येथे भगीरथ भालके यांनी २७ जून रोजी शेतकरी मेळाव्याचे आयोजन केले आहे. याच मेळाव्यात भालके हे मुख्यमंत्री राव यांच्या उपस्थितीत राष्ट्रवादीतून भारत राष्ट्र समितीत प्रवेश करणार आहेत. या वेळी केसीआर यांचे अख्खे मंत्रीमंडळ, खासदार आणि आमदार उपस्थित राहणार आहेत. त्यामुळे भालके यांनी शक्तीप्रदर्शनाची जोरदार तयारी केली आहे.तेलंगणाचे मुख्यमंत्री कार्यालयाचे दोन सचिव स्तरीय अधिकारी सोलापुरात दाखल झाले आहेत. या अधिकाऱ्यांनी जिल्हाधिकारी मिलिंद शंभरकर यांची भेट घेतली असून पंढरपुरात विठ्ठल मंदिरावर पुष्पवृष्टी करण्यासाठी हेलिपॅडची परवानगी मागितली आहे. त्याबाबत अजून निर्णय झालेला नाही, असेही जिल्हाधिकारी यांनी स्पष्ट केले. केसीआर यांचे संपूर्ण मंत्रिमंडळ सोमवारी (ता. २६) सोलापुरात मुक्कामी दाखल होणार आहे. मुख्यमंत्री, सर्व कॅबिनेट मंत्री, फक्षाचे खासदार व आमदार या प्रमाणे तीनशे लोकप्रतिनिधी शहरात दाखल होतील. बालाजी सरोवर, हॉटेल सूर्या, हॉटेल किनारा आदी ठिकाणी त्यांची मुक्कामाची व्यवस्था करण्यात आली आहे. पंढरपुरात श्री विठ्ठल दर्शनाची व्यवस्था भगीरथ भालके यांनी पाहिली आहे. विठ्ठलाच्या दर्शनानंतर सरकोलीत शेतकरी मेळाव्याला ते उपस्थिती लावणार आहेत. त्याच मेळाव्यात भालके यांचा बीआरएसमध्ये प्रवेश होणार आहे. भालके यांच्याकडे भोजन घेणार आहेत. त्यानंतर ते तुळजापूरला तुळजा भवानी मातेचे दर्शन घेणार आहेत.