काँग्रेसला हव्यात लोकसभेच्या २७ ते २८ जागा?; जागावाटपात तडजोड नाही, बैठकीत काय ठरलं?

आगामी लोकसभा निवडणुकांसाठी सर्वच पक्षांकडून जय्यत तयारीला सुरूवात करण्यात आली आहे. तर महाराष्ट्रात काँग्रेसनेही लोकसभेसाठी कंबर कसली आहे. काँग्रेसला आगामी निवडणुका महाविकास आघाडीत लढायची असली तरी, आघाडीमध्ये जागावाटपात मात्र तडजोड न करण्याची भूमिका ही घेण्यात आल्याचे समजते आहे. यानुसारच आता लोकसभेसाठी काँग्रेसला आघाडीतील २७ ते २८ जागा हव्या आहेत. काँग्रेसने नुकताच ४८ मतदारसंघांचा आढावा घेतला.भाजपला हिसका दाखवण्यासाठी महाविकास आघाडी मजबूत करायची अशी काँग्रेसची रणनीती असली तरी, महाविकास आघाडीत जागावाटपात पक्षाची फरपट नको, सन्मानपूर्वक जागा मिळायला हवे, अशी भूमिका काँग्रेसने घेतली आहे. २०१४ आणि २०१९ सारखी परिस्थिती आता नाही, बदललेल्या राजकीय परिस्थितीत काँग्रेसला २१ मतदारसंघामध्ये अनुकूल वातावरण असल्याचे काँग्रेसच्या बैठकीत मांडले गेले. त्यामुळे जागावाटपात आपण तडजोड करायची नाही, असे ठरल्याचे सांगण्यात येत आहे.

राज्याचे काँग्रेस प्रभारी एच के पाटील यांच्या उपस्थितीमध्ये मंगळवारी प्रदेश काँग्रेस समितीची बैठक पार पडली. याबैठकीत प्रदेशाध्यक्ष नाना पटोले, माजी मुख्यमंत्री सुशीलकुमार शिंदे, नेते अशोकराव चव्हाण, नेते पृथ्वीराज चव्हाण, आमदार सतेज पाटील आदी काँग्रेसजण उपस्थित होते.