मुंबई : रावेरच्या खासदार रक्षा खडसे यांना पक्षांतर्गत विरोधाला किती मोठ्या प्रमाणावर सामोरे जावे लागत आहे, याची झलक मंगळवारी (१९ मार्च) पाहायला मिळाली, ज्याची ध्वनी चित्रफीत समाज माध्यमांत व्हायरल झाली आहे. खडसेंच्या स्नुषा असल्याने रक्षा खडसे यांचे यंदा तिकीट कापले जाण्याची चर्चा होती. मात्र, भाजपने त्यांच्यावर विश्वास दाखवत पुन्हा उमेदवारी दिली. मात्र आपल्या प्रचारात मंत्री गिरीश महाजन यांचे नाव न घेता त्या राष्ट्रवादी शरदचंद्र पवार गटाचे कार्यकर्ते घेऊन प्रचार करत असल्याची तक्रार काही कार्यकर्त्यांनी केली. गिरीश महाजन यांच्यासमोरच हा सगळा प्रकार घडला, तेव्हा रक्षा खडसे यांचा चांगलाच पारा चढला होता. हीच ध्वनी चित्रफीत समाज माध्यमांत मोठ्या प्रमाणात चर्चेत आहे.
किती वर्षापासून पक्षात काम करताय? रक्षा खडसेंचा प्रश्न, कार्यकर्ता भडकला
रक्षा खडसे यांना उमेदवारी जाहीर झाल्यानंतर भाजपचे जळगाव-रावेरमधील भाजपचे अनेक कार्यकर्ते नाराज आहेत. अगदी अनेकांनी राजीनामे देत रोषही व्यक्त केलाय. जळगावमधील कार्यालयात लोकसभा निवडणुकीच्या रणनीतीच्या दृष्टीने गिरीश महाजन यांच्या प्रमुख उपस्थितीत भाजप पदाधिकाऱ्यांची बैठक संपन्न झाली. याच बैठकीत पक्षांतर्गत वाद उफाळून आला.रक्षा खडसे भाजपच्या उमेदवार असूनही शरदचंद्र पवार गटाच्या कार्यकर्त्यांना घेऊन त्या फिरतात. त्यांच्या संबोधनात त्या कुठेही गिरीश महाजन यांचं नाव घेत नाहीत? अशा तक्रारी एका पदाधिकाऱ्याने गिरीश महाजन यांच्यासमोर मांडल्या. तसेच इतरही पदाधिकारी रक्षा खडसे यांच्याविरोधात नाराजी व्यक्त करत होते. त्याचसमयी रक्षा खडसे देखील आक्रमक झाल्या.
कार्यकर्त्याने खासदार रक्षा खडसे यांची बोलती बंद केली
तुम्ही किती वर्षापासून पक्षात काम करता? असा प्रश्न त्यांनी एका पदाधिकाऱ्याला विचारला. त्यावर संबंधित पदाधिकाऱ्याने रक्षा खडसे यांना चांगलेच ऐकविले. “माझ्या वडिलांनी एकनाथ खडसे यांच्या प्रचारासाठी नोकरी सोडली किंबहुना त्यांना बडतर्फ केले गेले, त्यामुळे आमचे संपूर्ण घर रस्त्यावर आले. तेव्हापासून मी भाजपचे काम करतो. राष्ट्रीय स्वयंसेवक संघात मी सक्रिय आहे आणि तुम्ही मला विचारताय कधीपासून काम करतो, हे काही बरोबर नाही ताई” असा इतिहास सांगतच पदाधिकाऱ्याने रक्षा खडसे यांना उत्तर देऊन त्यांची बोलती बंद केली.रक्षा खडसे सलग दोन वेळा या मतदारसंघातून विजयी झाल्या आहेत. त्यांचे सासरे एकनाथ खडसे यांनी भाजपला रामराम ठोकून शरद पवारांच्या राष्ट्रवादी काँग्रेसमध्ये प्रवेश केल्याने येथील लढतीकडे सर्वांचे लक्ष लागले आहे. खडसेंच्या स्नुषा असल्याने रक्षा खडसे यांचे यंदा तिकीट कापले जाण्याची चर्चा होती. मात्र, भाजपने त्यांच्यावर विश्वास दाखवत पुन्हा उमेदवारी दिली.