काॅग्रेसच्या संपर्क अभियानाला माकणी येथून सुरुवात
निलंगा : आगामी लोकसभा व विधानसभा निवडणुकीच्या पाश्र्वभूमीवर काँग्रेस पक्षाच्या वतीने व्यापक कार्यक्रम राबविण्यात येत असून पक्ष बळकटीकरण, बुथ व ग्राम कमिटी गठण करण्यासाठी मतदान संपर्क अभियानाची सुरुवात काॅग्रेसचे प्रदेश सरचिटणीस अशोकराव पाटील निलंगेकर यांच्या अध्यक्षतेखाली व अभियानाचे समन्वयक काॅग्रेसचे प्रदेश सचिव अभय साळुंके यांच्या उपस्थितीत तालुक्यातील जाज्वल्य देवस्थान असलेल्या माकणी (थोर) येथून शनिवार (दि ६) सकाळी १० वा पासून सुरूवात होणार आहे.
तीन महिन्यावर आलेल्या लोकसभा व विधानसभा निवडणुकीची तयारी करण्यासाठी प्रदेश काँग्रेस कमिटी जोरदार तयारीला लागली असुन त्या अनुषंगाने मतदारसंघ वाईज लिडरशीप डेव्हलपमेंट व मतदार संपर्क अभियान राबविण्यात येत आहे. काॅग्रेसचे प्रदेशाध्यक्ष नाना पटोले व माजीमंत्री आ अमित देशमुख यांनी निलंगा विधानसभा मतदारसंघात मतदान संपर्क अभियान समन्वयक पदाची जबाबदारी काॅग्रेसचे प्रदेश सचिव अभय साळुंके यांच्या खांद्यावर दिली आहे. या अभियानातून लोकसभा निवडणुकीच्या दृष्टीने महत्त्वपूर्ण ग्राम व बुथ कमिटीच्या नेमणूका करुन मतदारांशी संवाद साधला जाणार आहे. निलंगा तालुक्यातील अभियान दौऱ्याच्या निमित्ताने शुक्रवारी काॅग्रेस जनसंपर्क कार्यालयात पदाधिकाऱ्यांची बैठक पार पडली. या बैठकीत तालुक्यातील दौऱ्याचे नियोजन करण्यात आले. हे अभियान काॅग्रेस पक्षाच्या पदाधिकारी व कार्यकर्त्यांमध्ये उत्साह निर्माण करणारे असल्याने शनिवारी होणाऱ्या उद्घाटन समारंभाला तालुक्यातील पदाधिकारी व कार्यकर्त्यांनी मोठ्या संख्येने उपस्थित राहावे असे आवाहन तालुकाध्यक्ष विजयकुमार पाटील, जिल्हा उपाध्यक्ष सुधाकर पाटील, माजी प.स सभापती अजित माने, शहराध्यक्ष अजित नाईकवाडे, तालुका कार्याध्यक्ष अँड नारायण सोमवंशी यांनी केले आहे.