मुंबई : दिशा सालियन मृत्यूप्रकरणी शिवसेना नेते आदित्य ठाकरे यांची चौकशी करण्यासाठी राज्य सरकारच्या वतीने एसआयटी स्थापन करण्यात आली आहे. त्यामुळे पुढच्या काही काळात आदित्य ठाकरे यांची चौकशी होणार आहे. या संपूर्ण प्रकरणी भाष्य करताना राज ठाकरे यांच्या पत्नी शर्मिला ठाकरे यांनी मोठं वक्तव्य केलं आहे. ‘आदित्य असं काही करेल असं मला तरी वाटत नाही’, असं म्हणत आदित्य ठाकरेंवर त्यांनी विश्वास दाखवला आहे.
राज्य विधिमंडळाचं हिवाळी अधिवेश नागपूरमध्ये सुरू आहे. या अधिवेशनात दिशा सालियन मृत्यूप्रकरणाचा मुद्दा उचलून सत्ताधाऱ्यांनी पुन्हा एकदा ठाकरे कुटुंबाला अडचणीत आणण्याचा प्रयत्न केला आहे. दिशा सालियन मृत्यूप्रकरणी आदित्य ठाकरे यांची चौकशी करण्यासाठी स्थापन करण्यात आलेल्या एसआयटीमध्ये अपर पोलीस आयुक्त राजीव जैन, उपायुक्त अजय बंसल, वरिष्ठ पोलीस निरीक्षक चिमाजी आढाव यांचा समावेश करण्यात आला आहे. तसेच वरिष्ठ पोलीस अधिकारी देवेन भारती हे एसआयटीवर लक्ष ठेवून राहणार आहेत.’उद्योग कर उद्योग कार्यक्रमा’साठी शर्मिला ठाकरे आल्या होत्या. याच संपूर्ण प्रकरणावर माध्यमांनी आदित्य ठाकरे यांच्या काकू, राज ठाकरे यांच्या पत्नी शर्मिला ठाकरे यांना प्रश्न विचारला. त्यावर बोलताना त्या म्हणाल्या, चौकशा तर कुणीही लावेल. आम्हीही या प्रकारातून गेलो आहोत. पण आदित्य असं काही करेल असं मला तरी वाटत नाही, अशी प्रतिक्रिया शर्मिला ठाकरे यांनी माध्यमांशी बोलताना दिली.सुशांत सिंग राजपूतची मॅनेजर दिशा सालियनचा मुंबईतील मालाडमध्ये मृत्यू झाला होता. इमारतीच्या १४ व्या मजल्यावरून पडून ती मृत्यूमुखी पडली होती. दिशाच्या मृत्यूचं प्रकरण सुशांत राजपूतच्या मृत्यू प्रकरणाशी जोडलं गेलं. सुशांतचा मृत्यू १४ जून २०२० रोजी झाला होता. काहींच्या म्हणण्यानुसार दिशाने आत्महत्या तर काहींच्या मते दिशाचा खून झाला. भाजपने हा मुद्दा मात्र आदित्य ठाकरे यांच्याशी जोडत आदित्य यांना आरोपीच्या पिंजऱ्यात उभं केलं. तेव्हापासून आदित्य ठाकरे यांच्या चौकशीची मागणी होत होती. अखेर राज्य शासनाने आदित्य ठाकरे यांची चौकशी करण्यासाठी एसआयटीची स्थापन केली आहे.