काँग्रेसची राजस्थान विधानसभेसाठी पहिली यादी जाहीर, गेहलोत सचिन पायलट रिंगणात

जयपूर : निवडणूक आयोगानं पाच राज्यांच्या विधानसभा निवडणुकांचा कार्यक्रम जाहीर केल्यानंतर राजकीय घडामोडी वाढल्या आहेत. मेघालय, राजस्थान, मध्य प्रदेश, छत्तीसगड आणि तेलंगाणा या पाच राज्यांमध्ये निवडणुका होणार आहेत. राजस्थानमध्ये काँग्रेस पक्ष सत्तेत असून पुन्हा सत्ता मिळवण्यासाठी त्यांचे प्रयत्न सुरु आहेत. तर, विरोधी पक्षातील भाजपनं देखील सत्ता मिळवण्यासाठी तयारी सुरु केली आहे. आज काँग्रेसकडून राजस्थान विधानसभा निवडणुकीसाठी पहिल्या ३३ उमेदवारांच्या नावांची घोषणा करण्यात आली आहे.राजस्थान विधानसभेची सदस्यसंख्या २०० इतकी आहे. या २०० जागांपैकी काँग्रेसनं पहिल्या टप्प्यात ३३ उमेदवारांची यादी जाहीर केली आहे. पहिल्या यादीत अशोक गेहलोत, सचिन पायलट आणि सी.पी. जोशी यांचा देखील समावेश आहे.

काँग्रेसनं मुख्यमंत्री अशोक गेहलोत यांना सरदारपुरा येथून उमेदवारी दिली आहे. तर, सचिन पायलट यांना टोंक मतदारसंघातून उमेदवारी जाहीर करण्यात आली आहे. विधानसभा अध्यक्ष सीपी जोशी यांना नाथवाडा मतदारसंघातून उमेदवारी देण्यात आली आहे.

राजस्थान में होने वाले विधानसभा चुनाव, 2023 के लिए भारतीय राष्ट्रीय कांग्रेस द्वारा जारी उम्मीदवारों की पहली सूची। pic.twitter.com/tOyTHUM2TN

— Congress (@INCIndia) October 21, 2023

काँग्रेसनं पहिल्या यादीमध्ये फार बदल केलेले नाहीत. राजस्थान काँग्रेस अध्यक्ष गोविंद सिंह डोटासरा हे त्यांच्या लक्ष्मणगड मतदारसंघातून निवडणूक लढवतील. ओसिया येथून दिव्या मदेरणा, हिंडोली येथून अशोक चांदना, सवाई माधोपूर येथून दानिश अबरार, जोधपूरमधून मनीषा पवार आणि सादूलपूर येथून कृष्णा पुनिया यांना उमेदवारी मिळाली आहे.

सचिन पायलट गटाच्या चार नेत्यांना उमेदवारी

काँग्रेसनं ३३ जागांवर उमेदवार जाहीर करताना यापूर्वीच्या ३२ उमेदवारांना संधी दिली आहे. यावेळी मुंडावर येथून ललित यादव यांना उमेदवारी दिली आहे. ते यापूर्वी बीएसपीकडून निवडणूक लढले होते. पहिल्या यादीत सचिन पायलट गटाच्या चार नेत्यांना उमेदवारी मिळाली आहे. विराटनगरमधून इंद्राज सिंह गुर्जर, लाडनू मधून मुकेश भाकर, परबतसर विधानसभा मतदारसंघातून रामनिवास गावडिया आणि नोहर मधून अमित चाचन यांना उमेदवारी मिळाली आहे. दरम्यान, राजस्थान राज्याची दर पाच वर्षांनी सत्तांतर करणारं राज्य अशी ओळख आहे. राजस्थानमध्ये सत्ता मिळवण्यासाठी काँग्रेस आणि भाजपमध्ये प्रमुख लढाई आहे. अशोक गेहलोत हे राजस्थानचे सरकार गेल्या पाच वर्षांपासून चालवत आहेत. या निवडणुकीत भाजप सत्तेत येणार की काँग्रेस सत्ता राखण्यात यशस्वी होणार हे पाहणं महत्त्वाचं ठरणार आहे.