सोलापूर:सध्या संपूर्ण देशात क्रिकेटचा फिवर जोरात आहे. यंदा आयसीसी वर्ल्ड कपचे आयोजन भारतात करण्यात आले आहे त्यामुळे सगळीकडील वातावरण क्रिकेटमय झालेले दिसून येतेय. मात्र, सोलापुरात एका व्यक्तीने क्रिकेट सामना पाहण्यात लाईटचा अडथळा आल्याने महावितरणच्या कर्मचाऱ्यावर हल्ला केल्याची धक्कादायक घटना घडली आहे.
लाइट का घालवता.. तुम्हाला मस्ती आली आहे, असे म्हणत महावितरणच्या एका कर्मचाऱ्याच्या डोक्यात स्ट्रीट लाइटचा पाइप मारत गंभीर जखमी केले. याबाबत शुक्रवार, १३ ऑक्टोबर रोजी दुपारी दोन वाजता विजापूर नाका पोलिस ठाण्यात गुन्हा दाखल करण्यात आला आहे. विद्युत पुरवठा खंडित झाल्यामुळे क्रिकेटची मॅच पाहता येणार नाही, म्हणून संतापलेल्या वीज ग्राहकाने महावितरण कर्मचाऱ्याच्या डोक्यात लोखंडी पाइपने मारहाण करून जखमी केले.सोलापुरातील औद्योगिक वसाहत वीज वितरण कार्यालयात बुधवारी ही घटना घडली. तर, या प्रकरणातील दोषींवर कडक कारवाई करावी, अशी मागणी महावितरण कर्मचारी संघटनेने सोलापूर पोलिसांकडे निवेदनद्वारे केली आहे. संघटनेच्या मागणीवरून तात्काळ विजापूर नाका पोलीस ठाण्यात गुन्हा दाखल झाला आहे. जुल्फेकार अब्दुल रफिक शेख (वय ५७, रा. सिद्धेश्वरनगर, मजरेवाडी) यांनी दिलेल्या फिर्यादीवरून संजय कोल्हापुरे (रा. महाराणा प्रतापनगर झोपडपट्टी, सोलापूर) याच्याविरोधात गुन्हा दाखल करण्यात आला आहे.
ट्रान्सफॉर्मर बंद करून कामकाज :
सोलापुर शहरातील कुमठा नाका परिसरात महाराणा प्रताप झोपडपट्टी येथील विद्युत लाईनवरील झाडाच्या फांद्या तोडण्याकरिता वीज कर्मचारी हे ११ ऑक्टोबर रोजी ट्रान्सफॉर्मर बंद करून काम करत होते. महाराणा प्रताप झोपडपट्टी भागात राहणाऱ्या संजय कोल्हापूरे या वीज ग्राहकाने औद्योगिक वसाहत उपकेंद्र येथे फोन करून ऑपरेटर झुल्फीकार शेख यांना जाब विचारला. त्यांनी काम चालू असल्याचे सांगितले. दीड तासांत वीजपुरवठा पूर्ववत होईल सांगताच कोल्हापुरे याने फोनवरुन अरेरावी सुरू केली. त्यानंतर तो दुपारी ४ वाजेच्या दरम्यान वीज ग्राहक उपकेंद्राच्या आवारात पोहचला आणि गोंधळ सुरू केला.
वीज कर्मचाऱ्यावर हल्ला:
औद्योगिक वसाहती मध्ये असलेल्या महावितरणच्या कार्यालयात ऑपरेटर जुल्फिकार शेख हे 11 ऑक्टोबर रोजी शासकीय कामकाज करत होते.संजय कोल्हापूरे हा गोंधळ करत, धमकी देत ‘मॅच चालु झाली आहे, तुम्ही मुद्दामहुन लाईन बंद केली’ म्हणत स्ट्रीट लाईटचा लोखंडी पाइप घेऊन धावून आला.ऑपरेटर जुल्फिकार शेख यांनी स्वतःचा बचाव केला. तो लोखंडी पाईप डोक्यात न लागता मानेवर लागला. या हल्ल्यात शेख हे बेशुद्ध पडले. त्यानंतर इतर कर्मचाऱ्यांनी त्यांना बेशुद्ध अवस्थेत खासगी रुग्णालयात दाखल केले असून, त्यांच्यावर उपचार करण्यात येत आहे.
पोलीस उपयुक्तांना वीज कर्मचाऱ्यांचे निवेदन:
शासनाच्या महावितरण विभागाकडून विनाकारण विद्युत पुरवठा बंद केले जात नाही. दुरुस्तीच्या कामांसाठीच बंद करावे लागते. ही गोष्ट नागरिकांनी समजून घेणे गरजेचे आहे. काही तक्रार असल्यास अर्ज करून किंवा शांततेत बोलून मार्ग काढता येतो. मात्र काही लोक जाणीवपूर्वक महावितरणचे अधिकारी, कर्मचाऱ्यांना त्रास देत आहेत. त्यासाठी अशा लोकांवर कडक कारवाई होणे गरजेचे आहे, असे महावितरणच्या संघटनेकडून देण्यात आलेल्या निवेदनात म्हटले आहे.