लातूर येथे सोमवारी ‘महिला आयोग आपल्या दारी’

लातूर येथे सोमवारी ‘महिला आयोग आपल्या दारी’  महिलांनी पुढाकार घेत आपल्या तक्रारी मांडण्याचे आवाहन

लातूर दि. 24 (जिमाका) : महाराष्ट्र राज्य महिला आयोगाकडून ‘महिला आयोग आपल्या दारी या उपक्रमांतर्गत लातूर जिल्ह्यातील तक्रारींची जनसुनावणी सोमवार, 28 ऑगस्ट 2023 रोजी सकाळी 11 वाजता नवीन जिल्हाधिकारी कार्यालयाच्या नियोजन भवन सभागृहात आयोजित करण्यात आली आहे. या जनसुनावणीत अधिकाधिक महिलांनी पुढे येऊन, न घाबरता आपल्या तक्रारी मांडाव्यात, असे आवाहन आयोगाच्या अध्यक्ष रुपाली चाकणकर यानी केले आहे.

महिलांना त्यांच्या जिल्ह्याच्या ठिकाणी न्याय मिळावा, यासाठी राज्य महिला आयोगाकडून ‘महिला आयोग आपल्या दारी’ हा उपक्रम राबविण्यात येत आहे. यामध्ये राज्य महिला आयोगाच्या अध्यक्ष रुपाली चाकणकर यांच्या उपस्थितीत 28 ऑगस्ट रोजी  जिल्हास्तरावर जनसुनावणी घेत महिलांच्या तक्रारीचे निवारण करण्याचा प्रयत्न आहे. जनसुनावणी नंतर महिला व बालकांच्या विषयांच्या अनुषंगाने लातूर जिल्ह्याची आढावा बैठक होईल. यावेळी जिल्हाधिकारी, पोलीस अधीक्षक तसेच कामगार आयुक्त, आरोग्य, परिवहन, शिक्षण आदी विभागाचे अधिकारी उपस्थित राहतील.

महाराष्ट्र राज्य महिला आयोग महिलांच्या सक्षमीकरणासाठी अविरत कार्यरत आहे. राज्याच्या कानाकोपर्यातील महिलांना मुंबई कार्यालयात येऊन तक्रार करणे, सुनावणीसाठी प्रत्यक्ष उपस्थित राहणे आर्थिकदृष्ट्या तसेच इतर कारणांमुळे शक्य होत नाही. त्यामुळे आयोग जिल्हा स्तरावर सर्व यंत्रणेनिशी जात आहे. महिला आयोग आपल्या दारी अंतर्गत जनसुनावणीला पोलीस, प्रशासन, विधी सल्लागार, समुपदेशक, जिल्हा समन्वयक आदी उपस्थित असल्याने तक्रारीवर त्याच ठिकाणी कार्यवाही करण्यात येते. यातून आपली कैफियत मांडणाऱ्या महिलांना त्वरित दिलासा देण्याच काम आयोग करत असल्याचे राज्य महिला आयोगाच्या अध्यक्ष रुपाली चाकणकर यांनी सांगितले.